KUCHING: Setipikit Sarawak Delta UNESCO Global Geopark (UGGp) udah disua ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba sebengkah pengawa ke diatur di Kompleks Satria Pertiwi ditu, Hari Empat.

Setipikit nya disuaka Sapit Premier Sarawak ke mega Menteri Pengeraja Asal enggau Pemansang Mengeri II sereta penyanding penemu Delta UGGp, Datuk Amar Awang Tengah Ali Hasan.

Pengawa maya nya bela digulu Sapit Premier Sarawak Datuk Amar Douglas Uggah Embas enggau Datuk Amar Profesor Dr. Sim Kui Hian, Menteri-Menteri Kabinet Sarawak sereta Sekretari Perintah Sarawak Datuk Amar Mohamad Abu Bakar Marzuki.

Geopark iya nya kandang endur ke bisi palan sereta landskap geologi ti ngembuan reti ngagai antarabansa enggau menua lalu diatur enggau holistik bepelasarka pekara pengawa nyaga, pelajar enggau pemansang meruan.

Sarawak Delta UNESCO Global Geopark mungkur urung 3,112 kilometer pesegi pemesai ke ngembuan penyelai geologi, biodiversiti nyengkaum kampung jelu mayas sereta pesaka daya idup orang asal ti ulih diangkat nyadi produk dagang temuai.

Basa nya mega nurai sejarah ungkup Sarawak sepengudah 17 taun pengeransing bala mayuh ti betuaika Opis Menteri Pengeraja Asal enggau Pemansang Mengeri Sarawak bebendar ngulihka gela nya.

Dulu ari tu, delegit Sarawak Delta betuaika Sapit Menteri Pengatur Mengeri, Tanah enggau Rampa Menua, Datuk Len Talif Salleh nerima setipikit nya ari UNESCO di Paris kena 27 April 2026. -EDISI UKAS