SEMATAN: Atlit Sarawak ditangkan ngambika bebendar agi nempa pemujur dikena nentu kontinjen Sarawak sekali agi ngempu gela champion ba Lumba
Malaysia Ke-22 (SUKMA XXII) Selangor 2026 tu ila.
Menteri Raban Nembiak, Lumba Enggau Pemansang Orang Dagang Sarawak Dato Sri Abdul Karim Rahman Hamzah madah, bala tuai nengeri sereta semua rayat sarawak ngandalka sida pulai mai gela nya ila.
Ku iya, pemujur tu semina ulih dipenyadi bala atlit ke besemekih ba lumba nya, mai nama Sarawak ngagai renggat nasional.
"Kami semina ulih meri jaku peransang enggau pengandal aja, tang ke bukai bepanggai ba kita semua. Nya alai anang ngelebu kami.
"Pulai mai Sarawak nyadi champion sekali agi, 'back-to-back' champion," ku iya madah.
Iya bejaku munyi nya maya pengerami nutup Champion Camp enggau Ngelanchar Countdown 100 Days Ke SUKMA XXII Selangor 2026 di Kem Putra Sentosa Retreat, ditu, Hari Tiga tu tadi.
Dato Sri Abdul Karim mega madah, semua atlit patut ngembuan pengeransing ba diri ngulihka pemujur taja betapi enggau atlit nasional.
"Enti kita tama gelanggang, anang nangi taja ke dilaban kita nya atlit nasional, laban sida mega tau alah.
"Anang meda diri nyadi lumur dua. Kembuan runding nadai orang ulih ngalahka kita," ku iya mekat baru.
Bela datai maya nya Sapit Menteri Raban Nembiak, Lumba enggau Pemansang Orang Dagang Sarawak Datuk Gerald Rentap Jabu enggau Datuk Dr Ripin Lamat, Kaban Kunsil Nengeri (ADUN) Tanjung Datu Azizul Annuar Adenan, Pemangku Tuai Pegawai Eksekutif Opis Lumba Sarawak Khairul Nizam Morshidi sereta ke bukai. -EDISI UKAS
Pemberita: Ahmad Daniel Faiz
Gambar: Ibanez Jeffery & George Embie
