Delegit Dagang Jerman Bisi Ati Deka Meranak Puku Ba Energi Gadung Di Sarawak
KUCHING: Delegit dagang ari Jerman bisi ati deka nyerungkai pengulih meranakka puku ba sektor energi gadung enggau teknologi meruan di Sarawak ke dipeda ulih nyadi hub energi di rantau tu dudi hari ila.
Sapit Menteri Energi enggau Pemeruan Rampa Menua Sarawak Datuk Dr Hazland Abang Hipni madah, bisi 18 iti kompeni ari Jerman ngulu randau begulai enggau opis menteri iya dikena berati pengulih nanggam kerejasama di nengeri tu.
Ku iya, delegit ti betuaika Direktor Eksekutif Balai Dagang enggau Industri Malaysia-Jerman, Hannes Farlock nya berandauka macham sektor baka pengangkut, minyak enggau gas, ngatur orang gawa, pelin tuju hidrogen enggau energi idar nengeri.
"Sida datai laban deka ngiga peluang ti disediaka Sarawak bepelasarka Pelin Pemansang Udah COVID-19 (PCDS) 2030, pelin kuing tuju hidrogen enggau energi idar nengeri.
"Sektor nya bela nyengkaum energi hidro, solar, hidrogen, ammonia, metanol, pengangkut, ngumpul enggau nyimpan karbon (CCOS) enggau bioenergi," ku iya.
Iya nerangka pekara nya ba aum media sepengudah betuaika MEESty Ministry Roundtable with Germany Business Delegation ditu, Hari Lima.
Iya mega madah, penanggul energi global enggau penyarut politik maya hari tu nejuka kompeni Jerman ngiga menua ke engkeman nyengkaum rantau Asia alai meranakka puku.
Nangkan nya, Hannes madah, sida beterima kasih ke pengawa bekunsika penemu enggau juluk ati pemansang energi gadung ti diterangka Sarawak maya randau nya.
Ku iya, pengelandik teknologi Jerman tebal agi nyauka sama enggau juluk ati Sarawak ba pemansang energi gadung baka hidrogen enggau energi ulih dikena baru.
Iya mega madah, Sarawak menua ti ngembuan pengelebih alai kompeni Jerman meranakka puku ke diatu sida mayuh agi di Semenanjung Malaysia.
"Ngarapka dudi hari ila bisi peluang dagang ungkup kami di Sarawak," ku iya madah. -EDISI UKAS
