KUCHING: Pemain industri ari Jerman madah ke diri bisi ati deka nempa kerejasama strategik meranak puku ba sektor pengangkut enggau logistik Sarawak ke diatu majak mansang.

Pekara nya dipadahka deligit Balai Dagang Enggau Industri Malaysia-Jerman (MGCC) maya penemuai basa enggau program randau begulai enggau Menteri Pengangkut Sarawak, Dato Sri Lee Kim Shin ditu, Hari Empat.

Penatai delegit nya betuaika Kaban Komiti Direktor MGCC, Dato’ Steven Aroki ke diatu di Sarawak serimbai Forum Dagang Jerman-Malaysia Ke-6 (GMBF) ke diatur di Kuching.

Randau maya nya dikena bekunsika penemu bekaul pemansang ekosistem pengangkut Sarawak nyengkaum penerebai bilun, perengka pengangkut mensia mayuh, logistik, pemansang penyangkai kapal, mobiliti enggau insiatif pengangkut moden.

Dato Sri Lee mega bekunsika juluk ati Sarawak ke deka ngemansangka sistem pengangkut nengeri seririh enggau Pelin Pemansang Udah COVID-19 (PCDS) 2030.

Tu bela nyengkaum Sistem Pengangkut Mengeri Kuching (KUTS) enggau sistem Autonomous Rapid Transit (ART) ngena hidrogen.

Kelimpah ari nya, iya bela madah ke pengeransing Sarawak nambah pejalai bilun ngena AirBorneo sereta nyeruri infrastruktur padang bilun, penyangkai kapal enggau terminal lori dikena nyukung pengerembai ekonomi, dagang temuai, dagang enggau pengawa meranak puku.

Dato Sri Lee enggau nya ngelalauka kerejasama Sarawak enggau Jerman lebih agi ba bidang mobiliti pintar, pengangkut energi beresi, inovasyen logistik, bekal industri enggau pemansang infrastruktur pengangkut.-EDISI UKAS