KANOWIT: Festival Main Asal Kanowit (KCF) 2026 ti keterubah diatur di Tebing Ai Pasar Kanowit bisi pengulih nyadi pelasar beguna ngempuru komuniti ari mayuh etnik, jalai pengarap enggau bansa ba semangat beserakup sereta begulai.

Menteri Penyerakup Bansa ti mega Kaban Parlimen Kanowit, Dato Sri Aaron Ago Dagang madah, pengawa ngatur festival ti berengkah ari 1 Mei tu tadi nerima timbal ti chukup manah ari peranak menua.

Ku iya, program baka nya nipak juluk Opis Menteri Penyerakup Bansa nyempil kaul komuniti nengah aktiviti ti digulu serap komuniti.

“Ba kami di Opis Menteri Penyerakup Bansa, aktiviti baka tu endang dikelalu laban nengah program tu, kitai ulih begulai ngempuru mayuh etnik, jalai pengarap enggau bansa ba siti pengawa.

“Kitai nadai nanggul begulai laban semua raban ulih ngambi bagi ba bemacham aktiviti ti diatur sepanjai dua minggu tu,” ku iya.

Iya madah munyi nya lebuh dirandau pemberita pengudah pengerami bejadi festival nya kena Hari Lima.

Kelimpah nyadi pelasar ngempung komuniti pupu bansa, Dato Sri Aaron mega ngarap festival nya ulih dikerembai nengah penerang media.

Ku iya, inisiatif nya ulih ngangkatka KCF nyadi sebagi ari produk dagang temuai ti ulih matak temuai ke Sarawak, kelebih agi ke Kanowit.

Dulu ari nya, muak ke pagi bisi ngatur Niti Daun ti dikemujur 36 kontinjen ari mayuh agensi perintah, sektor peribit, gerempung ukai dikuasa perintah (NGO), sekula sereta komuniti menua.

Ba pengawa nya, kontinjen Opis Pelajar Pelilih Kanowit dipadu nyadi champion kontinjen pemadu manah, dientudi kontinjen Indu Opis Polis Pelilih (IPD) Kanowit ba penuduk kedua enggau kontinjen Balai Bomba enggau Penyah Penusah Kanowit ba penuduk ketiga.

Sama datai, Kaban Kunsil Nengeri (ADUN) Ngemah Anyi Jana, ADUN Machan Allan Siden Gramong, Pegawai Pelilih Kanowit Cerisologo Sabut ti mega chairman pengatur sereta Temenggong Stanley Geramong Bandar. - EDISI UKAS