KUCHING: Perintah Sarawak benung ngelangkar Rang Undang-Undang (RUU) Kot Bumiputera ke baru dikena nyerenih struktur Kot Bumiputera Sarawak digaga enggau lebih agi efisyen.
Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat madah, pansik dikena nyerenih baru struktur enggau nyungkak tikas Kot Bumiputera Sarawak ke berengkah ari taun 2020 mujur tembu Februari 2023 ti udah dipejurai ngagai Kaunsil Aum Perintah Nengeri (MMKN) kena Julai 2023.
Ku iya, MMKN udah ngemendarka asil pansik 'Masterplan for the Transformation of the Native Courts of Sarawak' alai Kot Bumiputera Sarawak deka ngaga ubah ba Native Courts Ordinance, 1992.
"Dikena kitai nyerenih baru struktur tu, Native Courts Ordinance, 1992 patut dikinsil (repeal) lalu diganti enggau Ordinan Kot Bumiputera ke baru.
"Nya alai, siti RUU Kot Bumiputera benung dilangkar lalu deka dipejurai ba Kaunsil Nengeri," ku iya maya Aum Kunsil Nengeri (DUN) Sarawak Ke-19, Hari Dua.
Iya mega madah, struktur baru Kot Bumiputera Sarawak nengah RUU baru nya ila deka bekaul enggau ubah sereta struktur administresyen enggau kuasa kot.
Kelimpah ari nya, Datuk Jefferson madah, bisi 4,755 iti kes bekaul tanah adat Bumiputera udah direjista ba Kot Bumiputera Sarawak naka 1 Mei tu tadi lalu dichara ba tiga renggat Kot Bumiputera iya nya Kot Bumiputera Pelilih Menua, Kot Bumiputera Residen enggau Kot Ngapil Bumiputera Sarawak.
Iya madah, naka ke diatu 1,316 kes bedau diputar ba renggat Kot Bumiputera Pelilih Menua, Kot Bumiputera Residen (187 kes) enggau Kot Apil Bumiputera (92 kes).
Iya mega madah, Kot Bumiputera Sarawak bela numbuh macham chara strategik dikena mutar kes ke udah direjista.
Ku iya tu nyengkaum ngatur Capacity Building Programme (CBP) ti diatur di Sri Aman enggau Sibu lalu digulu 40 penyereta naka 30 April tu tadi kelimpah ngatur program randau ba renggat pelilih menua ke digulu 70 penyereta di Selangau, Sibu enggau Limbang naka 20 April tu tadi. -EDISI UKAS
Pemberita Ahmad Daniel Faiz
Gambar: Hazrin Sunaini
