RUU Kaunsil Padi Enggau Beras, Chara Strategik Nyamin Bekal Pemakai
KUCHING: Sarawak patut ngurangka agi pengawa kelalu bepanggai ba bekal beras import ketegal penanggul bekal pemakai global maya hari tu.
Kaban Kunsil Nengeri (ADUN) Tamin, Ir Christopher Gira Sambang madah, ubah klimet, konflik geopolitik, ungkus import sereta penanggul bekal pemakai global begunaka Sarawak patut nyungkakka agi pemansang industri padi enggau beras nengeri.
Ku iya, penumbuh Kaunsil Padi enggau Beras nengah Rang Undang-Undang (RUU) Kaunsil Padi enggau Beras Sarawak 2026 nyadi chara strategik dikena nentuka jamin bekal beras nengeri ba timpuh lama.
"Kitai udah meda beberapa bengkah menua berengkah ngurangka agi eksport pemakai sida ketegal ngira ungkup diri empu.
“Ba pekara tu, Sarawak enda ulih majak bepanggai ba bekal beras import," ku iya maya bejuraika RUU Kaunsil Padi enggau Beras Sarawak ba Aum Kunsil Nengeri (DUN) Sarawak Ke-19, Hari Dua.
Ir Christopher Gira madah, isu jamin pemakai maya tu ukai semina isu betanam betupi tang bekaul pengelikun enggau pengentap ekonomi nengeri.
Ku iya, kaunsil nya megai pengawa ke besai ngelanggur pemansang industri padi enggau beras, ngatur belanja, nyendia jali sereta ngaga umai di Sarawak.
Iya madah, chara strategik nya seriris enggau tuju penumbuh Pelin Pemansang Udah COVID-19 (PCDS 2030) bekaul jamin pemakai, pemansang meruan enggau pengerembai ekonomi inklusif.
Berindik ari nya, iya ngansak perintah lengkas agi ngadu sektor betanam betupi nyadi moden lebih agi di menua pesisir nengah pengawa ngena teknologi pintar, sistem entali ai moden enggau mansik benih padi betikas tinggi.
Iya mega madah, pengawa ngaul nembiak ba sektor agro moden bela patut disungkakka agi nengah latih teknologi betanam betupi, skim agropreneur enggau pemansang orang dagang bepelasarka inovasyen.-EDISI UKAS
