KUCHING: Pengawa Opis Kereja Raya (JKR) Sarawa ngena ‘Schedule of Rates’ (SOR) deka nentu projek Program Transformasyen Menua Pesisir (RTP) digaga enggau lurus, konsisten sereta efisyen lebih agi di menua pesisir.

Sapit Menteri Infrastruktur enggau Pemansang Penyangkai Kapal Sarawak Datuk Ir Aidel Lariwoo madah, SOR ke dikena nya siti chara netap rega enggau chara teknikal nitihka rega maya hari, rega kereban ngaga sereta guna injiring enggau teknikal projek.

Ku iya, chara nya mega besai reti dikena nentu tiap iti projek RTP ulih digaga nitih standard ke sebaka kelimpah ngelengkaska agi proses ngemendar enggau ngaga projek.

"SOR tu bela nyungkak pengelurus, konsistensi sereta akauntabiliti ba belanja, kelimpah ngurangka penau rega enda setipak enggau projek tauka taba projek," ku iya madah.

Iya nerang ke pekara nya maya nimbal tanya Kaban Kunsil Nengeri (ADUN) Meradong, Datuk Ding Kuong Hiing ba Aum Kunsil Nengeri (DUN) Sarawak Ke-19, Hari Tiga.

Nerang silik ku iya, tebal agi projek RTP di Sarawak digaga di menua pesisir ke tusah dilawa alai ungkus projek besai agi.

Iya madah, pekara logistik meri penanggul alai kereban tauka ramu projek dibai enggau macham chara nyengkaum ngena jalai darat, sungai enggau tasik.

"SOR mega deka nentuka projek ulih tembu nitih langgur projek," ku iya madah baru.

Iya madah, Opis Menteri Infrastruktur enggau Pemansang Penyangkai Kapal (MIPD) deka nentuka SOR dipejalaika enggau mujur. -EDISI UKAS