KUCHING: Perintah Sarawak majak ngenegap agenda transformasyen digital nengeri nengah pengawa numbuh Inisiatitif Ngemanah Rentayan SACOFA (SACOFA Network Modernisation) ke beungkus RM185 juta ti disadang ulih nyungkak tikas pemanah infrastruktur telekomunikasyen di selampur Sarawak.

Menteri Utiliti enggau Telekomunikasyen Sarawak Dato Sri Julaihi Narawi madah, inisiatif ke berengkah ari November 2025 nya dipelabaka ulih tembu suku kedua taun 2027.

"Inisiatif tu berengkah ari Kuching lalu bela deka digaga di selampur Sarawak.

"Naka ke diatu, 17 peratus projek udah digaga," ku iya.

Iya nerangka pekara nya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Satu.

Nerang silik, ku iya, kapasiti projek nya deka ditambah ari 1.6 tera-bit sesikin (Tbps) ngagai 7.2 tera-bit sesikin Tbps.

Kelimpah ari nya, iya madah, pengelaju ba semua endur deka ditambah ari 10 gigabit sesikin (Gbps) ngagai 100 Gbps.

Ku iya, projek nya deka nyukung guna digital ti majak nambah nyengkaum ba servis perintah, sektor dagang enggau pemansang ekonomi digital Sarawak. -EDISI UKAS

Pemberita: Nur Nabilla
Gambar: Ibanez Jeffery Guang & Muhammad Rais Sanusi