KUCHING: Perintah Sarawak mengkang ngansak pengawa mansik entara baru penuduk pengawa bepilih di nengeri tu ngambika pengawa pengari rayat ulih dikereja enggau lebih agi engkeman nyerumba pemesai menua sereta guna pemansang maya hari tu.

Menteri ba Opis Premier Sarawak Dato Sri John Sikie Tayai madah, taja pengawa magi sereta mansik baru penuduk di pegai Komiti Pengawa Bepilih (SPR) tang Perintah Sarawak ngarapka pengawa nya ulih digaga enda lama agi.

Ku iya, isu nya nyadi bepun ari pemesai reti pengawa ngatur enggau ngemansang rayat Sarawak lebih agi di menua pesisir.

"Ba pekara tu, Perintah Sarawak mengkang chakah ngenataika penemu ngagai Perintah Besai senentang pemesai reti ngerumban magi penduduk baru nyengkaum nengah randau Sempekat Malaysia 1963 (MA63) ari Kaunsil Pengatur Sempekat Malaysia 1963 (MTPMA63) ti betuaika Menteri Besai empu," ku iya madah.

Iya madah munyi nya maya nyimpul jaku opis menteri iya ba Aum Kunsil Nengeri (DUN) Sarawak Ke-19, Hari Satu.

Penemu nambah penuduk pengawa bepilih Sarawak sebedau tu suah dibantai ketegal ngira pemesai nengeri tu kelimpah pemayuh tubuh rayat majak nambah sereta ketegal ngira pemujur meri servis ngagai rayat.

Taja pia, Dato Sri John Sikie enda ngenggai pengawa ngaduka pansik nya bepanggai ba konstitusyen ke udah ditetap SPR. -EDISI UKAS