SINGAPURA: Pengeransing Perintah Sarawak nyukung transformasyen industri mimit karbon majak tebantai alai Bintulu Transitioning Industrial Cluster (TIC) deka dilanchar di Bintulu.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Bintulu TIC siti inisiatif ditumbuh nengah kerejasama enggau Forum Ekonomi Dunia (WEF) ke diatur di Kuching bulan siti agi.

“Koridor Bintulu-Samalaju diatu bisi industri gas, gas asli cecair (LNG), petrokimia, hidrogen, sum enggau kuasa ulih dikena baru.

"TIC ngatur semua nya bepelasarka visyen industri mimit karbon, ngeluar hidrogen, ngumpul enggau nyimpan (CCUS), ekonomi idar enggau ngaga digital digaga nyadi siti sistem," pia ku iya.

Iya madah ke pekara nya maya ngenataika jaku ‘Sarawak and the Region: A Green Economy Being Built in Real Time’ ba Philanthrophy Asia Summit 2026 di Sands Expo and Convention Centre, Marina Bay Sands ditu, Hari Satu.

Premier Sarawak madah, kerejasama perintah nengeri enggau WEF dikena ngatur projek Bintulu TIC nya deka ngempung pengelandik global bekunsika penemu sereta numbuhka peluang kerejasama baru lalu nentu kluster nya digaga bepelasarka standard dunya ba pekara pemeruan enggau pemujur ngatur.

"Tu deka meri pengandal sereta ngurangka penanggul nyadi lalu deka ngerumban pemansang. Tu mega meri kelai ngagai dunya alai Sarawak ukai semina ngemeran tang nyadi menua ke ngaga," ku iya madah.

Sebedau tu, pemutus milih Bintulu nyadi TIC keterubah Malaysia ari WEF udah diterangka Premier Sarawak maya bejaku ba Konferens Hidrogen Asia Dunya 2025 di Tokyo.

Nambah ke jaku iya, Datuk Patinggi Abang Zohari madah, Sarawak mujur ngurangka intensiti pemansut grid elektrik 73 peratus ari taun 2010 nyentuk 2022 nengah kuasa ulih dikena baru.

“Projek Hidroelektrik Baleh ngembuan kapasiti 1,285 megawatt disadang ulih berengkah dikena ba taun 2030. Kami mega benung nambah kapasiti ngagai 10 gigawatt ba taun 2030 lalu 15 gigawatt ba taun 2035," pia ku iya.

Datuk Patinggi Abang Zohari madah, Sarawak mega benung nyungkak transformasyen ke besai agi, ngelui sektor energy nengah pengawa ngerembaika ekonomi seraya ngurangka pemansut karbon.

Iya madah, Sarawak diatu dipadu nyadi nengeri ‘net-negative’ nengah pengawa ngena kampung nyimpan mayuh agi karbon ari penyampau ke dipansut.

"Penguji besai kami ukai semina ngulihka 'net zer' tang ngetanka status ‘net-negative’ maya ekonomi majak ngerembai," ku iya madah.

Bela datai maya nya Sekretari Perintah Sarawak (Pengatur Ekonomi enggau Pemansang) Dato Sri Dr Muhammad Abdullah Zaidel, Tuai Pegawai Eksekutif Kumpulan Sarawak Energy Datuk Sharbini Suhaili, Pemangku Sekretari Mendam Opis Menteri Energy enggau Pemeruan Rampa Menua Sarawak, Ts. Dr. Nurleyna Yunus enggau Pemangku Tuai Pegawai Eksekutif Sarawak Water Sdn Bhd Malseni Jamal. - EDISI UKAS