KUCHING: Pengeransing Perintah Sarawak ngenegap pemansang utiliti enggau telekomunikasyen semampai disungkak nengah agih RM9.29 bilion ba Langgur Pemansang Malaysia Lumpar Ke-13 (RMK-13) enggau Alternative Funding.
Menteri Utiliti enggau Telekomunikasyen Sarawak Dato Sri Julaihi Narawi madah, opis menteri iya enggau semua agensi bekaul chakah nentu semua projek tembu digaga nitih pematut.
Ku iya, Perintah Sarawak bisi ngungkup agih RM5.3 billion nengah RMK-13 (RM1.3 bilion) enggau Alternative Funding (RM4 bilion) dikena ngaga 347 projek ai.
"Naka ke diatu, 289 iti tauka 83 peratus projek bekal ai udah tembu.
"Kelimpah ari nya, RM597 juta mega udah diungkup ba taun 2026 dikena ngaga projek ai nengah RM-13 enggau Alternative Funding," ku iya nerang.
Iya madah ke pekara nya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Satu.
Bekaul Pelin Besai Bekal Ai enggau Grid Ai Sarawak, iya madah, penyampau diguna bisi 2,300 juta liter sehari (JLH) lalu penyampau nya dipelabaka manggai 3,500 JLH ba taun 2030.
"Dikena nentu bekal ai nadai penanggul, Perintah Sarawak benung bejalaika Pelin Besai Bekal Ai enggau Grid Ai Sarawak.
"Penyampau guna ai di menua pesisir bisi nambah ari 71 peratus taun siti tadi nyadi 71.9 peratus naka ke diatu.
"Ba ba kandang mengeri penyampau bela nambah ari 85.6 peratus taun siti tadi nyadi 86.1 peratus," ku iya nerang.
Kelimpah ari nya, iya madah, opis menteri iya bela benung ngaga sistem grid bekaul ai nyengkaum 'water intake', loji ai, ngaga paip, tangki ai simpan, stesyen pam sereta ke bukai nengah Pelin Besai Ai enggau Grid Ai Sarawak.
"Sistem grid bekal ai tu digaga ba selampur Sarawak enggau chara berenggat," pia ku iya. -EDISI UKAS
