KUCHING: Perintah Sarawak nengah Opis Menteri Utiliti enggau Telekomunikasyen (MUT) nyungkak pengawa nyikap musim kemarau ke disadang datai nyentuk September taun tu.
Menteri ba opis menteri nya, Dato Sri Julaihi Narawi madah, musim kemarau dipelabaka deka ngurang tikas peninggi ai ba tekat ai ba beberapa bengkah endur di Sarawak.
Iya madah, tu tau ngenataika penanggul operasyen loji ai, hidroelektrik kelimpah nanggul sida ti agi ngena sungai.
"Opis menteri aku nengah Opis Bekal Ai Menua Pesisir (JBALB), Sarawak Water enggau Sarawak Energy semampai matau lalu bejalaika pengawa bekaul.
"Tu nyengkaum besaup enggau Komiti Pengatur Penusah Ngenyit Nengeri Sarawak (JPBNS), Agensi Pengatur Penusah Ngenyit Menua (NADMA) enggau Opis Meteorologi Malaysia (MET Malaysia) ti bela ngelanggur pengawa menih remang," pia ku iya.
Iya madah munyi nya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Satu.
Nerang silik, Dato Sri Julaihi madah, bekal karan di Sarawak naka ke diatu nadai penanggul sereta chukup dikena.
Ku iya, Sarawak Energy semampai nentu sistem karan nadai bepenanggul kelimpah nambah tikas transformer nyema patut enggau nyendia mobile generator ba menua ke bisi penanggul.
Lalu ba bekal ai, iya madah, JBALB enggau Sarawak Water bisi nyendiaka 122 lori tangki ai ke deka dianjung ngagai genturung pendiau ti bisi penanggul ai ketegal kemarau. -EDISI UKAS
Pemberita: Nur Nabilla
Gambar: Muhammad Rais Sanusi
