SHCTF Ditegap, Nyukung Juluk Ati Ngaga 20,000 Rumah Ulih Dibeli Ba 2030
KUCHING: Perintah Sarawak ransing ngenegap Turu Sarawak Housing Contribution Trust Fund (SHCTF) nyadi instrumen pekara wang strategik ke dikena ngerumban agi pengawa ngaga rumah ulih dibeli ti lebih agi meruan, sistematik sereta inklusif ba selampur nengeri.
Sapit Premier Sarawak Datuk Amar Dr Sim Kui Hian madah, naka 30 April 2026, turu nya bisi RM5.68 juta ke dikena nyukung pengawa numbuh macham inisiatif pengawa ngaga rumah rayat di Sarawak.
Ku iya, perintgah nengeri diatu deka lebih agi nyungkak penyikar ngumpul enggau matau turu nengah transformasyen digital nyengkaum nyerenih sistem Housing Development and Maintenance System (HOMEAPPS).
"Chara tu disadang ulih nyungkakka agi pengelurus, penyikar operasyen sereta ngerumban pengawa ngaga," ku iya madah.
Iya nerang ke pekara nya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Dua.
Iya ke mega Menteri Pengerai Mensia Mayuh, Pengawa Berumah enggau Perintah Menua madah, SHCTF majak deka disungkak ke nyadi mekanisme pekara wang ti disadang ulih nyaup ngemujurka juluk ati perintah nengeri ngaga 20,000 buah rumah ba taun 2030.
Berebak enggau nya, beberapa iti agensi nyengkaum Custody and Development Authority (LCDA), Housing Development Corporation (HDC), Bintulu Development Authority (BDA) enggau Opis Menteri Industri Pemakai, Komoditi enggau Pemansang Kandang Menua (M-FICORD) bela nyaup ngatur macham inisiatif enggau program pengawa berumah di Sarawak.
Nambah ke jaku iya, Datuk Amar Dr Sim madah, saup ari agensi nya ngelai pengeransing perintah nengeri nentuka rayat bisi rumah diri empu. -EDISI UKAS
