KUCHING: Menua ASEAN patut ngaga siti langkar kereja begulai ti nyemetak sereta disetuju semua dikena ngaga Grid ASEAN.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja mayuh langgur ngaga grid nya ari beberapa bengkah menua ASEAN, tang langkar kereja ke nyemetak sereta diterima semua empai bisi.
"Endang bisi langgur ari Laos ke Singapura lalu pia mega langgur ari kitai ke deka nampung kuasa ngagai Indonesia, Filipina enggau Singapura.
"Tang nyentuk diatu empai bisi chara ke engkeman baka ni pengawa tu ulih digaga," pia ku iya.
Iya nerang ke pekara nya maya dirandau media sepengudah bejadika Asia Pacific Green Hydrogen Conference and Exhibition (APGH) 2026 ditu, Hari Dua.
Datuk Patinggi Abang Zohari madah, Sarawak diatu ngena chara bekerejasama enggau menua bukai dikena ngaga rentayan kuasa serantau.
Ku iya, diatu mega Sarawak nampung karan ngagai Kalimantan Timur, Indonesia nengah Sarawak Energy Berhad (SEB) lalu deka ditampung ngagai menua Brunei enggau Singapura.
Beduduk ari pekara nya, Premier Sarawak ngarapka ASEAN ulih beratika chara ke dikena Kesatuan Eropah (EU) ba pengawa ngatur sistem kuasa kilah entara menua ti tau nyadi lalau ngaga langkar kerejasama Grid ASEAN.
Iya madah, Sarawak ba penuduk ke engkeman ulih nyukung agenda kuasa serantau bepun ari pengulih nempa mayuh agi kuasa.
"Ba kitai, kitai ulih ngasilka kuasa laban juluk kitai ba taun 2030 deka ngasilka kuasa manggai 10 gigawatt (GW).
"Naka ke diatu, Sarawak semina begunaka urung 6GW aja tang nyema pemansang majak nyadi baka ke dilanggur, nyangka kitai begunaka urung 1GW agi.
"Reti iya kitai bisi lebih urung 3GW," ku iya nerang.
Bela datai maya nya Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, raban Menteri Kabinet Sarawak enggau Perintah Besai, Sekretari Perintah Sarawak Datuk Amar Mohamad Abu Bakar Marzuki, raban Sapit Menteri Kabinet Sarawak, Tuai Opis Perintah sereta pemesai ke bukai. -EDISI UKAS
Pemberita: Ahmad Daniel Faiz
Gambar: Muhammad Rais Sanusi
