ICOMOS 2026 Matak Lebih 1,100 Deligit Antarabansa Ke Sarawak
KUCHING: Sarawak deka ditapat dunya lebuh lebih 1,100 deligit antarabansa udah rejista ngulu Konvensyen Besai enggau Simposium Saintifik ICOMOS Ke-22 ke deka diatur di Kuching kena 17 nyentuk 24 Oktober tu.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, penyampau sida nya semina ngaul penyereta ari menua luar lalu enda nyengkaum rejista penyereta ari Malaysia ke disadang nambah ba hari nyadi konvensyen nya.
Ku iya, ICOMOS 2026 nyadi keterubah achara besai nya diatur di Malaysia, lalu meri basa besai ngagai Sarawak nyadi tuai rumah.
“Naka diatu, lebih 1,100 deligit ari selampur dunya udah rejista. Tu empai nyengkaum penyereta ari Malaysia ke disadang rejista nyau semak hari pengawa nyadi.
“Kitai melaba penyampau tu deka majak nambah lalu tentu nyadi pekara ti ngemegahka Sarawak,” ku iya.
Iya nyebut pekara nya ba aum media sereta pengawa besilih Sempekat Pemereti Ati (MoU) entara ICOMOS Malaysia enggau Sarawak Heritage Society ditu, Hari Dua.
Dato Sri Abdul Karim madah, konvensyen besai nya diatur ukai semina ngangkatka Sarawak enggau Malaysia nyadi palan randau global pasal pengawa ngintu pesaka, pemansang meruan enggau komuniti ulih beretan aja, tang meri peluang ngelaku nengeri tu ngagai dunya.
Ku iya, perintah deka ke tetiap deligit ke datai ukai semina ngulu konvensyen aja, tang mega ngasai pemanah rampa Sarawak, pemakai asal enggau produk dagang temuai lokal sebedau nyadi duta mit ke ngelakuka nengeri tu ngagai menua sida empu.
Iya mega madah, pemansang enggau pengawa ngintu pesaka patut dipejalai begulai laban pesaka ukai semina bekaul sejarah aja, tang pangku pengawa nempa identiti komuniti, nyukung dagang temuai budaya sereta meri peluang ekonomi ngagai industri kreatif enggau asal.-EDISI UKAS
