Sarawak Ransing Mutar Penusah Ampuh Bah, 45 Projek Baru RMK-13
KUCHING: Perintah Sarawak ransing mutar penusah ampuh bah nengah pengawa ngaga 45 iti projek nagang penusah bah enggau sistem parit mengeri ke beungkus RM265.29 juta nengah Langgur Pemansang Malaysia Ke-13 (RMK-13).
Sapit Premier Sarawak, Datuk Amar Prof Dr Sim Kui Hian madah, Opis Parit Enggau Entali Ai (DID) Sarawak deka ngemeratka projek ti mai empas besai dikena nentuka pemujur ngatur ai enggau parit di selampur nengeri.
"Perintah Sarawak ransing nyikap nengeri tu nengah macham projek dikena nyeliah penusah ampuh bah," pia ku iya.
Iya nerangka pekara nya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Dua tu tadi.
Iya ke mega iya ke mega Menteri Pengerai Mensia Mayuh, Pengawa Berumah enggau Perintah Menua madah, ari semua projek nya, 15 iti projek benung digaga lalau 30 iti ke bukai benung dilangkar.
Ba pekara bekaul, iya madah, nengah RMK-12, DID Sarawak bisi nerima agih belanja RM97.35 juta dikena ngaga 24 projek nagang pengusah bah enggau sistem parit ba mengeri selampur Sarawak.
Ku iya, ari penyampau nya, tiga iti projek udah tembu lalu siti agi benung digaga kelimpah 20 iti agi projek benung dilangkar sebedau belabuh digaga berengkah ari taun tu enggau chara berenggat.-EDISI UKAS
