BlackBerry, UKM Nyerungkai Pengulih Nempa Kerejasama Teknologi Dudi Hari Di Sarawak
KUCHING: BlackBerry Limited enggau Universiti Kebangsaan Malaysia (UKM) nyerungkai pengulih nempa kerejasama strategik teknologi dudi hari begulai enggau Sarawak bekaul komunikasyen likun, semikonduktor, energi gadung enggau komputer kuantum dikena nyukung juluk ati nengeri tu nyadi hub teknologi frontier ba taun 2030.
Tuai Pegawai Eksekutif BlackBerry Ltd. US, John Giamatteo madah, Sarawak dipeda ngembuan pengulih alai ngemansangka teknologi nya nengah kerejasama sektor perintah, prebet enggau institusyen pelajar.
Ku iya, sebagi ari pekara bela dirandau nyengkaum teknologi komunikasyen likun ti bekaul enggau data, pengelikun enggau sistem notifikasyen lebih agi maya penusah enda disadang nyadi baka ampuh bah.
"BlackBerry bisi teknologi komunikasyen likun ti komprehensif lebih agi bekaul enggau pengelikun data ke ulih nyaup perintah nyaga pengelikun data rayat enggau menua.
"Di Sarawak, teknologi ke bisi notifikasyen maya penusah ngenyit beguna endar lebih agi maya bisi penusah ampuh bah nyadi tauka ubah klimet," ku iya madah.
Iya bejaku munyi nya ngagai media sepengudah ngatur penemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ditu, Hari Tiga.
Nangkan nya, Mandal Canselor UKM, Profesor Dato Dr Sufian Jusoh madah, UKM, BlackBerry Limited sereta bakih universiti antarabansa nyengkaum Massachusetts Institute of Technology enggau University of Cambridge benung berati peluang ulih ngemansangka teknologi nya begulai enggau Perintah Sarawak.
"Kerejasama tu seririh enggau juluk ati deka nempa Sarawak nyadi hub teknologi frontier enggau menua mansang manggai taun 2030," ku iya madah.
Bela datai maya nya Sapit Sekretari Perintah Sarawak (Pengatur Ekonomi & Pemansang) Dato Sri Dr. Muhammad Abdullah Zaidel.-EDISI UKAS
