BETONG: Program Pemandang Raja Kitai Renggat Sarawak 2026 ke diatur serimbai Hari Pengada Kebawah Duli Yang Maha Mulia Seri Paduka Baginda Yang di-Pertuan Agong Ke-17 nyadi pelasar nambah penemu mensia mayuh senentang institusyen Raja Berperlembagaan.

Program pemandang nya berengkah ari 11 ngagai 14 Jun tu diatur Opis Muzium Malaysia, Opis Residen Sitak Betong enggau Opis Pemadah Malaysia.

Pengerami mantar ngelanchar program nya dipenyadi Sapit Menteri Raban Nembiak, Lumba enggau Pemansang Orang Dagang Datuk Gerald Rentap Jabu ti ngarika Menteri ba Opis Premier Sarawak Dato Sri John Sikie Tayai ba Balai Lumba Tan Sri Datuk Amar Stephen Kalong Ningkan ditu, Hari Empat.

Pengerami bela dirichah Ajat Ngalu Temuai ari Serakup Indu Dayak Sarawak (SIDS) Betong.

Sepengudah bejadika pengerami, Datuk Gerald dibai meda program pemandang ti bekaul enggau penerang senentang institusyen Yang di-Pertuan Agong.

Nangkan nya, iya datai meda Betong Kitchen ke diatur nyentuk 14 Jun tu.

Bela datai maya nya Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, Residen Sitak Betong Datu Richard Michael Abunawas, Direktor Unit Protokol, Adat enggau Pengatur Pengerami Sarawak, Datu Hamdan Sabrini, Direktor Opis Pemadah Sarawak, Sabri Said sereta bala bukai.-EDISI UKAS