KANOWIT: Pengawa ngentak baru Rumah Komiti Pemansang enggau Pengelikun Pendiau (JKKK) Tr Nasa @ Lika Francis di Bukit Sesanggau, Sungai Mapai, beungkus RM150,000 diatu udah tembu menyana lalu meri pengelantang ngagai peranak rumah panjai nya.

Kaban Kunsil Nengeri (ADUN) Ngemah, Anyi Jana madah, projek Program Transformasyen Menua Pesisir (RTP) nya entara inisiatif seruran dipejalaika perintah dikena nyendiaka perengkaguna ti diguna peranak menua pesisir.

“Projek ke digaga Opis Kereja Raya (JKR) nyadi agensi teknikal nya beungkus RM150,000.

“Sekumbang aku nyadi pengari rayat ba sitak Kunsil Nengeri (DUN) Ngemah, semua rumah panjai ba sitak Ngemah udah nerima pemaik ari projek RTP nitih utai diguna sida,” ku iya lebuh bejadika projek nya enggau Ngiling Bidai JKKK Bukit Sesanggau Sungai Mapai, Jalai Nibong Tada, kena Hari Enam.

Anyi mega madah ke pemesai guna penyerakup ba peranak rumah panjai nentuka mayuh agi pemansang ulih dibai ke sitak DUN Ngemah dudi hari.

Ku iya, pemansang ke deras agi ulih diasai enti rayat majak begempung sereta meri kerejasama ngagai bala tuai ke bisi.

“Penyerakup deka ngenegapka sada peminta rayat lalu muntang endur kitai mai mayuh agi pemansang ngagai perintah sereta opis menteri bekaul,” ku iya.

Iya ngena peluang nya meri pengaga ati ngagai 69 nembiak ari Sekula Sekondari (SMK) Nanga Dap enggau SMK Kanowit ke bulih pemutus nyulut ba peresa Sijil Pelajaran Malaysia (SPM) empai lama.

Iya ngarap ke apai indai majak bejalaika pangku pengawa nentuka bala anak bulih pelajar ti menyana dikena nyamin pengidup meruan agi dudi hari.

Ba pengerami ke sama, Anyi ngemendarka geran Projek Mit Pemansang Menua Pesisir (MRP) penyampau RM 5,000 ngagai JKKK Rh. Nasa @ Lika enggau RM 3,000 ngagai Biro Indu Rh. Nasa @ Lika dikena ngatur aktiviti ninting taun sida. -EDISI UKAS