SARIKEI: Mayuh inisiatif ngintu pengelantang rama dipejalaika Perintah Sarawak terus meri pemaik ngagai rayat, mungkur bantu ngagai anak mit, indai, nembiak, raban umang sereta orang tuai.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, mayuh program bantu dipejalai ngayanka perintah nengeri endang naka ulih nentuka pengelantang rayat dijaga semua.
Ku iya, entara inisiatif dipejalai iya nya Endowment Fund Sarawak (EFS), Bantn Indai Beranak (BIB), subsidi bayar tadika sereta mayuh skim bantu pengelantang enggau perubat.
Ku iya, naka April taun tu, lebih 150,000 akaun EFS udah diadu ungkup anak mit ke patut nerima pemeri RM1,000 ari perintah nengeri.
“Indai ke patut nerima mega ampit nerima BIB sepenyampau RM450 maya beranak, seraya ruang bilik bepenatai pemisi RM7,000 enggau mimit agi tau minta subsidi bayar tadika nyentuk RM1,000 setaun,” ku iya.
Iya nyebut pekara nya ba mua mayuh rambau Program ‘Kamek Prihatin Kitak Penting’ Zon Sarikei, di Begunan Opis Perintah Sarawak (IAC) Bagi Menua Sarikei, Hari Enam.
Dato Sri Fatimah madah, perintah nengeri mega bisi nyendiaka mayuh bantu ngagai raban ti beguna nyengkaum bantu pengelantang ninting bulan, bantu berubat sereta bantu khas ngagai pesakit ti begunaka sekeda perubat.
Ku iya, pengawa negapka rentayan nyaga pengelantang rama nya dipejalai seriris enggau pemansang fizikal nentuka pengelantang rayat seruran dikenati.
“Pemansang ukai semina nyelinting pengawa ngaga infrastruktur aja, tang mega mantu rayat ti begunaka bantu ngambi sida ulih idup enggau lantang,” ku iya.
Iya mega madah, naka diatu lebih 56,000 penerima bantu pengelantang dirikod ba selampur Sarawak enggau penyampau belanja ngelui ari RM126 juta.
Iya madah baru, perintah deka terus ngena asil pemansang nengeri ngagai rayat nengah mayuh program ngintu pengelantang enggau inisiatif rama ke meri pemaik terus ngagai rayat.-EDISI UKAS
