SARIKEI: Raban renggat baruh Indu Parti Pesaka Bumiputera Bersatu (PBB) Sarawak terus bejalaika pengawa besai ba pengawa negap enggau pemujur Gabungan Parti Sarawak (GPS) ngambi rayat seruran andal.
Menteri Pemansang Indu, Nembiak Mit enggau Pengelantang Komuniti Sarawak ke mega Tuai Indu Parti Pesaka Bumi Bersatu (PBB) Sarawak, Dato Sri Fatimah Abdullah madah, pangku pengawa indu beguna endar nentuka atur gawa ke parti lanchar sebedau, maya enggau pengudah pengawa bepilih.
Ku iya, pemujur dijapai PBB ngelama tu ukai semina bepanggai ba bala tuai parti aja, tang disukung raban gawa ti berurun, sikar enggau seruran bejalai ngundang rayat.
“Raban indu nyadi tiang sukung ke pengering parti. Nya kebuah kitai patut terus ngetanka pemanah pengawa enggau pengeransing ati maya bejalaika tanggungpengawa ngagai rayat,” ku iya lebuh bejaku ba Pengerami Makai Lemai Simpulan Kasih di Balai Mayuhguna Kampung Seberang Sarikei, kena Hari Enam.
Iya madah, PBB ba penuduk ke chukup tegap bulih sukung rayat laban bisi bala tuai ti ngembuan kuing ti nyengala sereta seruran berati ke pemansang nengeri.
Ku Dato Sri Fatimah, penau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyadi tuai udah mai mayuh ubah positif ti marit pemansang sereta ngangkatka Sarawak pegari ba renggat nasional enggau antarabansa.
Iya mega madah, rikod penyulut GPS ngemansangka nengeri nyadi pun ti ngasuh rayat andal ke gempung nya.
“Rayat empu meda mayuh pemansang enggau inisiatif dipejalaika perintah. Nya kebuah, pengandal ti diberi patut terus dijaga nengah kereja enggau servis,” ku iya.
Iya nyemetak madah ke pengering GPS enda ulih diserara ari pangku pengawa PBB nyadi parti pugu ba gempung nya.
Nya alai, iya meransang semua kaban parti terus ngenegapka penyerakup dalam parti sereta nentuka raban gawa seruran sedia napi sebarang pemar dudi hari.
Nambah ke nya ku iya, sukung rayat ke bisi diatu patut dibantai nengah servis ke manah ngambi PBB enggau GPS tetap relevan sereta dipilih rayat Sarawak.-EDISI UKAS
