SARIKEI: Chara gawa ngundang rayat ke menua dikemeran Gabungan Parti Sarawak (GPS) ngayanka parti nya seruran mereti enggau mutar isu rayat nadai ngira maya tauka gaya politik maya hari.

Sapit Menteri Perambu Mengeri, Pengatur Tanah enggau Rampa Menua ke mega Mandal Presiden Parti Pesaka Bumiputera Bersatu (PBB) Sarawak, Datuk Len Talif Salleh madah, servis ngagai rayat seruran dikemerat bala tuai GPS lalu dipejalai belama, ukai semina maya pengawa bepilih aja.

Ku iya, bala tuai enggau raban gawa ke parti seruran ngundang rayat nentuka tetiap penanggul ditapi ulih dikelala lalu diputar manah.

“Servis ngagai rayat enda ulih dipejalai bemusin. Nyadi tuai enggau kaban parti, kitai patut seruran bisi enggau rayat sereta mereti ke sada peminta sida belama.

“Chara tu mih dikemeran GPS ngelama tu nentuka pengelantang rayat seruran dijaga,” ku iya.

Iya nibar ke jaku nya ba Pengerami Makai Lemai Simpulan Kasih di Balai Mayuhguna Kampung Seberang Sarikei, kena Hari Enam.

Datuk Len Talif madah, semua raban gawa ke parti patut terus ngadu pengawa ba renggat baruh nentuka kaul enggau rayat seruran rat enggau tegap.

Ku iya, pengeran ngundang rayat ngasuh mayuh isu enggau peminta peranak ulih dikenatai terus ngagai perintah ngambi diadu.

Iya mega madah, pengawa ngundang rayat ke menua mega nyadi pelasar pemadu manah ninga empu timbal pasal penemban polisi enggau program pemansang ke dipejalaika perintah.

“Lebuh kitai seruran bisi ba menua, kitai ulih mereti ke peminta rayat lalu ulih merambu nama pengawa ke patut diadu nitih peneka sida,” ku iya.

Iya madah baru, kerejasama rat entara perintah enggau rayat beguna endar dikena nentuka agenda pemansang ulih dipejalai lanchar sereta meri pemaik ngagai serap rayat.

Iya andal ke semangat segulai sejalai terus ditarak entara GPS enggau rayat deka nyadi pun pekara ti nentuka pemansang sereta pengelantang Sarawak ulih ditampung dudi hari.

Sama datai, Menteri Pemansang Indu, Nembiak Mit enggau Pengelantang Komuniti Sarawak ke mega Tuai Indu PBB Sarawak Dato Sri Fatimah Abdullah, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) ke mega Sapit Tuai Indu PBB Sarawak Datuk Sharifah Hasidah Sayeed Aman Ghazali, Sekretari Raban Indu PBB Sarawak ke mega Senator Susan Chemerai Anding, Kaban Parlimen Tanjong Manis ke mega Tuai Pampang N.46 Meradong Dato Yusuf Abd Wahab, sereta Kaban Parlimen Igan ke mega Tuai Pampang N.45 Repok Ahmad Johnie Zawawi.-EDISI UKAS