SERIAN: Pengawa asal enggau pesaka budaya patut seruran dijaga nentuka identiti nyelai rayat Sarawak meruan taja napi segang pemansang moden majak deras.

Sapit Menteri Pemansang Genturung Pendiau enggau Kandang Menua ke mega Kaban Parlimen Kota Samarahan, Datuk Rubiah Wang madah, pengawa ngintu Ngiling Bidai ukai semina kelai Gawai Dayak tembu diintu aja, tang nyadi lambang penyerakup, kaul diri sebilik enggau bebasa ke adat asal ti ditampung bejeman.

Ku iya, pesaka budaya nyadi reta berega ti nempa nama raban bansa lalu patut majak ditan ngambi enda lenyau ngapa disegang pemansang jeman.

“Ngiling Bidai ukai semina nutup pengerami Gawai, tang lambang nyagu budaya enggau adat ke nyadi pun ti nempa nama raban bansa kitai.

“Enti pesaka tu enda dijaga, kitai tau lenyau sebagi ari identiti ke ngasuh Sarawak nyelai enggau pegari nama,” ku iya lebuh bejadika Pengerami Ngiling Bidai Zon Semeran 2026 di Dewan Kampung Bedega, kena Hari Enam.

Iya madah, program baka nya beguna endar dikena ngenegapka penyerakup rayat pupu bansa sereta nentuka pengawa asal raban bansa Dauak majak ditampung rebak biak.

Iya mega meransang raban nembiak regas ngaul diri nyadi penyungkak pemansang rayat ba program ngaul komuniti enggau main asal.

“Raban nembiak ukai semina patut ngembuan penemu enggau pengelandik aja, tang mega pemanah ulah enggau bisi tanggungpengawa ngagai komuniti nentuka pemansang ditampung dudi hari,” ku iya.

Sama datai, pengari Pegawai Pelilih Siburan, George Harison Rojek, Tuai Komuniti Kampung Bedega, Rantai Anggau, KMKK Pelilih Serian enggau Siburan sereta bala tuai menua nya. - EDISI UKAS