BINTULU: Pengerami Do Ledoh ukai semina lambang terima kasih raban bansa Kayan aja, tang nyadi pelasar beguna ngenegapka penyerakup raban bansa sereta nyikap rebak biak napi pemar enggau peluang ekonomi dudi hari.
Kaban Kunsil Nengeri (ADUN) Telang Usan ke mega Presiden Serakup Kayan Sarawak (PKS), Dato Dennis Ngau madah ke pengerami ninting taun nya nalan ngempung raban bansa Kayan ari mayuh menua di Sarawak kelimpah nyadi pelasar ngenegapka identiti, semangat segulai sejalai sereta kaul diri sekaban ba raban bansa nya.
Ku iya, penyerakup ke tegap beguna endar nentuka raban bansa Kayan majak nyingkang mansang nipak arus pemansang nengeri sereta ulih ngena manah peluang ke bisi nengah Strategi Pemansang Pengudah COVID-19 (PCDS) 2030.
Iya nibar ke jaku nya ba mua mayuh rambau Pengerami Makai Lemai Pengerami Do Ledoh Serakup Kayan Sarawak (PKS) Pampang Bintulu 2026, ditu, Hari Enam.
Ngenang silik, iya madah ke Do Ledoh mega nyadi pelasar ngintu pesaka budaya raban bansa Kayan nyengkaum jaku, muzik asal, tanda, ngepan enggau adat asal ngambi ditampung rebak dudi.
Ku iya, pengawa ngintu pesaka budaya patut seriris enggau pemansang ngambi identiti raban bansa Kayan tetap relevan enggau disagu ba jeman moden.
Ngenang pekara bukai, Dato Dennis madah ke pelaar terus diberi perati dikena nempa mayuh agi raban profesional enggau orang dagang ba raban bansa Kayan, kelebih agi ba bidang bepelasarka teknologi enggau ekonomi digital.
Ku iya, rebak biak patut ngerebut peluang ba sektor strategik baka teknologi pemadah, ‘artificial intelligence’ (AI), injiniring enggau dagang ngambi ulih besemekih ba rampa ekonomi ke majak ngerembai.
“Raban bansa Kayan patut sedia napi ubah enggau ngena peluang ari pemansang ke benung bejalai di Sarawak. Pelajar enggau pengelandik nya kunchi nentuka raban bansa kitai majak maju enggau ulih besemekih,” ku iya nyemetak.
Sama datai, Pegawai Pengawa Khas Menteri Dagang Temuai, Seni enggau Budaya, Steven Kong Kai Seng sereta Residen Bagi Menua Bintulu Datu Nyurak Keti. -EDISI UKAS
