KAPIT: Program Komuniti Nadai Tibi ke diatur serimbai Pengerami Ngiling Bidai di Rumah Juntan, Nanga Elik mujur nambahka penemu peranak menua pesisir pasal pemesai guna nyaga pengerai, lebih agi ba pengawa nagang enggau nyidi tumu penyakit tibi.

Program diatur Klinik Pengerai Nanga Bena enggau kerejasama mayuh agensi perintah sereta bala tuai raban bansa menua nya ke bela nyadi pelasar nyempil kaul entara peranak enggau agensi gawa kelimpah ngintu pesaka budaya peranak menua.

Kaban Kunsil Nengeri (ADUN) Pelagus, Wilson Nyabong Ijang madah, program baka nya beguna endar dikena nyeridi peranak pasal pengeraya penyakit tibi sereta pemesai guna nganjung diri beperesa enggau berubat tumu.

“Kerejasama semua raban beguna endar nentuka pengawa nyidi tumu enggau berubat ulih dipejalai nemban sereta muai peragam penemu enda manah pasal pesakit Tibi,” ku iya.

Iya bejaku munyi nya ba Program Komuniti Nadai Tibi enggau Pengerami Ngiling Bidai di Rumah Juntan, Nanga Elik, kena Hari Minggu.

Wilson mega nyemetak madah ke program nya ukai semina meri pemaik ari sukut pengerai mensia mayuh aja, sereta nyempil kaul rayat, bala tuai enggau agensi perintah.

Sama datai, Sekretari Politik Menteri Kereja Raya, Datuk Alvin Runggah Jimbun ke ngari ke Menteri Kereja Raya, Dato Sri Alexander Nanta Linggi, Sapit Residen Bagi Menua Kapit Robert Liman Deli, Penyeraris Palan Servis Parlimen Kapit Ambrose Abong Bugek, Tuai Rumah Juntan sereta bala tuai opis enggau agensi perintah nengeri enggau Perintah Besai.-EDISI UKAS