KUCHING: Lebih 700 penyereta ngaul raban pakar profesional, kaban akademik, pengereja landik, pemekuh industri sereta pemansik ngulu Malaysian Regional Geotechnical Engineering Conference (MRGEC) 2026 ke keterubah diatur di Sarawak.

Menteri Kereja Raya, Dato Sri Alexander Nanta Linggi madah, penyampau tubuh penyereta jauh ngelui ari disadang lalu ngayanka pemesai guna industri berumah, lebih agi ba bidang injinjiring geoteknikal.

Ku iya, timbal ke chukup manah nya mega ngayanka pengeran pemekuh industri sama ngiga chara mutar pemar pemansang infrastruktur ke majak mayuh leman.

“Kitai ngarap ke semua tuju ke ditetap ulih dijapai sekumbang dua ngagai tiga hari konferen tu diatur.

“Baka udah dipadah, bisi mayuh penemu enggau peneleba ulih dikunsi ba bidang tu.

“Pemadu beguna iya nya baka ni semua penemu, penemu pakar enggau penemu ditemu ke dikerandau ulih dikena maya bejalaika projek ke meri pemaik ngagai rayat nyentuk renggat baruh,” ku iya.

Iya nyebut pekara nya ba aum media pengudah Pengawa Bejadi Malaysian Regional Geotechnical Engineering Conference (MRGEC) 2026 ba siti hotel tebilang ditu, Hari Tiga.

Iya madah, rambai jaku 'Resilient Ground, Sustainable Future', MRGEC2026 meri perati ngagai empat bidang besai injiniring geoteknikal iya nya 'Innovation In Geotechnic and Site Investigation', 'Slope Stability and Landslide', 'Foundation' sereta 'Ground Improvement'.

Dato Sri Alexander madah, tuju konferen nya nyendiaka pelasar bekunsika inovasyen, penemu enggau teknologi kelimpah mandangka aplikasi teknikal moden ba injiniring geoteknikal.

Konferen nya pengawa begulai entara Opis Menteri Kereja Raya, Opis Kereja Raya (JKR) Sarawak enggau JKR Sabah ngaul 33 pengelicha ari mayuh agensi enggau organisasyen kelimpah ngatur 45 taba pemandang ke digulu operator servis, pemekal enggau pengatur industri geoteknikal.

Sama datai, Direktor JKR Sarawak Datu Dr Cassidy Morris enggau Sapit Direktor JKR Sabah Mohammad Safri Abdul Hadi. -EDISI UKAS

Pemberita: Ahmad Daniel Faiz