KUCHING: Perintah Besai deka nyiri kompeni konsesi pengintu ke deka bejalaika pengawa mutar isu rentayan redline di Jalai Besai Pan Borneo Sarawak ke ngaul urung 136 kilometer pejalai.
Menteri Kereja Raya, Dato Sri Alexander Nanta Linggi madah, pemutus ngena chara nya udah disetuju empai lama ngambi pengawa mutar isu nya belabuh dipejalai enda lama da.
“Nya alai, mensia mayuh enda ibuh irau laban enda lama da pemutus deka digaga lalu kompeni bekaul deka dichiri ngambi bejalaika pengawa nya,” ku iya.
Iya nyebut pekara nya ba aum media pengudah Pengawa Bejadi Malaysian Regional Geotechnical Engineering Conference (MRGEC) 2026 ba siti hotel tebilang ditu, Hari Tiga.
Iya mega madah, sekeda chara bukai mega deka dipejalai dikena mutar isu nya.
Taja pia, iya madah, isu 'Redline' Jalai Besai Pan Borneo begunaka belanja khas ketegal anggar semua begunaka RM900 juta.
Berebak enggau nya, Dato Sri Alexander Nanta madah, Perintah Besai agi ulih ngatur enggau mutar empas kereban ngaga jalai ke niki diatu enggau enda ibuh nambah agih belanja ungkup projek pemansang ke benung dipejalai.
Naka diatu ku iya, empas perang ba rentayan bekal enggau ungkus kereban empai datai ba tikas ke ngirauka ati.
“Enti perang majak nyadi lalu belabuh ngeruga bekal bahan api baka petrol enggau minyak, baru empas deka berasai endar lalu maya nya strategi ke udah dilanggur deka dikena.
“Pekara tu bepanggai ba gaya makit enggau ekonomi kemaya hari,” terang iya.
Iya madah, KKR enggau Kaunsil Pemansang Industri Berumah Malaysia (CIDB) udah bejalaika tungkap lalu mantaika asil tungkap nya ba Kaunsil Pengatur Ekonomi Menua (MTEN), nyengkaum strategi-strategi ke tau dikena mutar isu nya. -EDISI UKAS
