BARIO: Projek ngadu enggau nangkir pemanjai jalai STOLport Bario beungkus RM27 juta diatu manggai 65 peratus lalu disadang tembu Oktober taun tu.

Sapit Menteri ba Opis Premier Sarawak (Pengereja Kasar, Imigresen enggau Matau Projek) Datuk Gerawat Gala madah kediri tepantup ati meda projek nya ke digaga enggau manah.

“Projek nya ngaul pengawa nangkir pemanjai jalai bilun ari 665 meter ngagai 930 meter, kelimpah pengawa melakin baru jalai ke bisi, ngaga endur entepan bilun tambah, ngadu pagar perimeter sereta endur entepan kerita mensia mayuh.

“Taja projek tu nadai endur bilun besai sangkai di Bario, tang nya deka nambah penyampau bilun Twin Otter ari semilan penumpang diatu ngagai 19 penumpang pengudah projek tembu ila,” ku iya lebuh dirandau Unit Komunikasi Awam Sarawak (UKAS) kena Hari Tiga.

Iya ke mega Kaban Kunsil Nengeri (ADUN) Mulu madah, projek nya beguna endar dikena ngenegapka rentayan pengangkut langit kandang menua ulu, lebih agi peranak Bario enggau Ba’ Kelalan ke bepanggai ba servis langit nyadi jalai penyambung enggau menua bukai di Sarawak.

Lebuh tembu ila ku iya, projek nya deka nambah tikas pengelikun, pengelantang enggau penyikar operasyen penerebai, lalu nyukung ekonomi tumbuh, dagang temuai enggau pengelantang peranak menua nya.

Iya mega madah, operasyen penerebai ke Bario nadai dikachau sekumbang pengawa dipejalai enggau taga jam penerebai ninting hari agi baka selama.

“Jalai semina deka diadu pengudah penerebai kepenudi ngejang ari Bario, entara pukul 12.30 tengah hari ngagai 2 ngalih hari,” terang iya.

Dulu ari nya kena Hari Dua, iya nyempulang Sapit Menteri Pengangkut Malaysia, Datuk Hasbi Habibollah serimbai penemuai gawa ke STOLport Ba’ Kelalan enggau Bario begulai enggau delegit Opis Menteri Pengangkut Sarawak (MOTS) sereta agensi bekaul.

Di Bario, raban udah diberi penerang silik ari Opis Kereja Raya (JKR) Sarawak bekaul status pejalai projek sebedau ngabas empu taba projek.

Seraya, di STOLport Ba’ Kelalan, raban nya udah mendingka penerang ari Malaysia Airports Holdings Berhad (MAHB) bekaul gaya perengkaguna padang bilun ke diatu sebedau ngabas terminal enggau jalai bilun terebai.

Sama datai, Sekretari Mendam MOTS, Datu Wong Hee Sieng, Sekretari Unit Langit Opis Menteri Pengangkut Malaysia, Mohd Radzuan Mazlan, Penyanding Penemu Teknikal Langir MOTS, Sio Yew Hua, Tuai Unit Pengangkut Langit MOTS, Dayang Nurhayati enggau Menijar Padang Bilun Kandang Menua Borneo MAHB, Jefri Ramli. -EDISI UKAS