SIBU: Peminta enggau peneka baru dibantai peranak rumah panjai deka diserenih nentuka tetiap isu ke ditapi ulih diputar nemban.

Sapit Menteri Pelajar, Inovasyen enggau Pemansang Penau Sarawak ke mega Kaban Kunsil Nengeri (ADUN) Nangka, Datuk Dr Annuar Rapaee madah, iya seruran nerima timbal penemu ari rayat laban nya beguna endar dikena mantu perintah ngelala peminta kebendar rayat ba renggat baruh.

“Aku seruran nerima timbal penemu enggau peminta ari rayat. Pangku pengawa aku mending, nyerenih peminta sida enggau bejalaika pengawa nitih pematut.

“Kami deka terus bekerejasama enggau agensi bekaul dikena mutar isu ke ditapi komuniti,” ku iya lebuh dirandau pemberita rambau pejalai Ngabang Gawai Dayak di Rumah Jok Igon kena Hari Tiga.

Iya madah, pekara infrastruktur enggau pengelantang peranak menua pesisir deka terus diberi perati nengah pemansang ke dipejalai inklusif.

Iya mega madah ke agih belanja RM250,000 udah diberi sebedau tu ungkup kereja ngadu ke Rumah Jok Igon dikena nambahka pengelantang enggau pengelikun peranak.

Tambah mega ku iya, kerejasama ngilah entara sitak bepilih beguna endar nentuka pemansang ulih dipejalai nyerangkung semua.

“Pemadu beguna, rayat bulih pemaik enggau peranak menua pesisir majak mansang seriris enggau pemansang di selampur Sarawak,” ku iya.-EDISI UKAS