KUCHING: Kompeni bilun enggi Perintah Sarawak, AirBorneo deka ngena tambang baru ti kompetitif agi ungkup pejalai penerebai ba minggu baru tauka tengan bulan tu, nyengkaum pakej tambang ti mungkur bagasi pemakai dalam bilun nadai caj tambah.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, berita manah nya ngaul sekeda pejalai, kelebih agi penerebai Kuala Lumpur-Kuching, nipak pengeransing perintah nengeri nyendiaka tambang ti ulih dibayar rayat.
“Aku ulih meri peragam. Tambang penerebai Kuala Lumpur-Kuching deka murah agi baka udah disemaya kitai.
“Rega tambang nya nyengkaum bagasi enggau pemekai dalam bilun laban kompeni bilun ngelama tu minta bayar tambah ungkup bagasi, tang AirBorneo udah ngira semua nya nyengkaum pemakai dalam bilun,” ku iya.
Iya nyebut jaku nya lebuh dirandau pemberita pengudah Pengawa Nyua Belanja Ngaga Begunan Palan Aktiviti Orang Tuai (PAWE) Sri Satok di Palan Pengintu Pengelantang Datuk Amar Hajah Juma’ani, ditu Hari Minggu.
Ba pun taun tu tadi, Premier Sarawak madah ke AirBorneo deka ngepunka operasyen bilun jet bulan Julai 2026 ungkup renggat kedua pemansang kompeni bilun enggi Perintah Sarawak nya.
Operasyen dipun enggau pejalai Kuching ke Kuala Lumpur, Kota Kinabalu, Singapura enggau Jakarta pengudah Renggat Kedua nyendiaka Servis Langit Menua Pesisir (RAS) ngena bilun turboprop.
