SIBU: Mensia mayuh ditesau sampal datai ngerichah Program Sarawakku Sayang (SKS) Renggat Sitak Sibu ke deka diatur 10 ngagai 12 Julai tu ba Dataran Tun Tuanku Haji Bujang.

Sapit Sekretari Perintah Sarawak (Operasyen) Datu Hii Chang Kee ke mega Chairman Komiti Pengatur Renggat Sitak (Sibu, Sarikei, Mukah enggau Betong) madah, naka ke diatu pengawa nyikap program nya nyau deka tembu.

"Batang tuju program tu diatur iya nya deka ngenegapka agi kaul perintah enggau rayat.

"Maya program tu mensia mayuh ulih ngadu macham pengawa baka ngaga peminta Bantu Barang Diguna Sarawak (SKAS), Skim Pelajar Tinggi Pechuma (FTES), bantu pengelantang, pengawa puang nengah JobSarawak enggau ulih datai intebiu ba 10 iti kompeni.

"Semua iya bisi 47 agensi perintah nyendia 158 iti kaunter servis ba program tu," pia ku iya.

Iya nerangka pekara nya ba aum media ditu, Hari Satu.

Iya mega madah, Sarawak Pavillion enggau Sarawak Kitchen & Sales deka berengkah dibuka ari pukul 9 pagi ari 10 Julai.

Ku iya, Sarawak Pavillion bela bisi mandangka macham projek pemansang ke benung enggau deka digaga ba Sitak Sibu nyengkaum projek ba Langgur Pemansang Malaysia Ke-13 (RMK13).

"Ba Sarawak Kitchen & Sales bisi macham bansa pemakai baka kampua, kompia dabai sereta ke bukai nyengkaum produk pemakai menua tu empu," ku iya madah baru.

Iya madah, kena 11 Julai, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg deka datai bejadika program nya, pukul 10.30 pagi ti disadang digulu lebih 5,000 iku mensia mayuh.

"Dulu ari nya, Premier Sarawak deka ngabas projek ke digaga ba Taman Rimba Bukit Lima sebedau ngirup pagi ba Makit Sentral Sibu.

"Lalu muak ke malam, mensia mayuh deka beperindang enggau artis menua tu empu ba Konsert Rayat belabuh pukul 8 lemai," pia ku iya.

Bela datai ba aum media nya, Residen Sitak Sibu Superi Awang Said, Sekretari Opis Kaunsil Mengeri Sibu (MPS), Henry Jalin Watt, Sapit Direktor Unit Matau Pengawa Ngatur Sarawak (SIMU) Ashree Wee enggau Sapit Direktor Unit Komunikasi Awam Sarawak (UKAS) Mohamed Faizal Shah Ali. - EDISI UKAS