KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi udah nerima penemuai basa ari delegit Yayasan Pencegahan Jenayah Malaysia (MCPF) Pampang Sarawak di Astana Negeri Sarawak, Hari Satu.

Tuju penemuai basa nya dikena ngenegapka agi kerejasama strategik MCPF enggau tuai Perintah Sarawak ti deka nyungkakka agi pengawa ngemunas penyalah, pengelikun komuniti, penemu mensia mayuh enggau pengelantang rama.

Maya nya, Tun Pehin Sri Dr Wan Junaidi beterima kasih ngagai MCPF Sarawak ke bebendar ngiri penemu bekaul pengawa nyeliah penyalah lalu meransang sida chakah agi ngaul raban nembiak, penemu komuniti enggau ngatur inisiatif nyeliah penyalah.

Iya mega madahka diri nyukung undang-undang baru ti ngenegapka tanggungpengawa begulai enggau apai indai sereta Gerempung Apai Indai enggau Pengajar (PIBG) mutar isu 'buli'.

Bela dirandau maya nya nyengkaum bekaul inisiatif ngemunas penyalah, program begulai enggau komuniti, nembiak, pengelikun siber enggau kerejasama strategik begulai enggau agensi penerit adat sereta institusyen pelajar.

Kelimpah ari nya, randau bela bekaul juluk ati HELP University ti deka numbuh kampus di Sarawak ti nyaup pemansang modal mensia, pengawa mansik enggau ngaul komuniti.-EDISI UKAS