KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi udah nerima penemuai basa Pesuruhjaya Tinggi Bangladesh ke Malaysia Manjurul Karim Khan Chowdhury di Astana Negeri Sarawak, Hari Satu.

Awak nya nyadi pelasar nyintal kaul Sarawak enggau Banglades lebih agi bekaul ekonomi, dagang, pelajar enggau pemansang orang gawa.

Maya nya, bela dirandau bekaul pengulih nempa kerejasama strategik ba macham sektor baka betanam betupi, jamin pemakai, energi ulih dikena baru enggau pelajar tinggi.

Kelimpah ari nya, randau mega bisi ngaul pemesai reti nyungkak tikas pelajar ba bidang Sains, Teknologi, Injiniring enggau Matematik (STEM) ti nyadi pugu pemansang ekonomi dudi hari.

Pemujur pengawa maya nya mandangka pengeransing deka ngenegapka agi kaul enggau pangan diri seraya nyidi pengulih nempa kerejasama. -EDISI UKAS