SIBU: Sapit Sekretari Perintah Sarawak (Operasyen) Datu Hii Chang Kee udah datai ngabas palan alai ngatur Program Sarawakku Sayang (SKS) 2026 Renggat Sitak Sibu ke dilanggur berengkah ari 10 ngagai 12 Julai tu.
Penatai iya dikena meda kediri pengawa nyikap palan program nya, Hari Satu.
Sekeda ari palan ke diabas iya baka Taman Rimba Bukit Lima di Sentosa Salim ke deka alai ngatur 'briskwalk' begulai enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba hari kedua program belabuh ari 6.30 pagi.
Datu Hii mega bisi ngabas Dataran Tun Tuanku Haji Bujang ti nyadi panggau endur batang program SKS ke sekali tu.
Penatai iya maya nya bela disempulang Residen Sitak Sibu Superi Awang Said, Menijar Besai Sarawak Forestry Corporation (SFC) Abang Arabi Abang Aimran, Pegawai Pelilih Sibu Tsong Chow Choon, Pegawai Pelilih Kanowit Cerisologo Sabut enggau Sekretari Opis Kaunsil Mengeri Sibu (MPS) Henry Jalin Watt.
Program ke diatur Perintah Sarawak tiga hari berunggu nya disadang digulu macham agensi ti meri penerang servis kereja perintah ngagai mensia mayuh.
Kelimpah ari nya, program mega bela disempulang ‘Sibu Kitchen & Sales’.
Nitihka tusun program, program deka dirichah enggau Malam Budaya Sarawak ke diatur kena 10 Julai alai mensia mayuh deka beperindang enggau macham pesaka budaya etnik kelimpah bela beperindang enggau artis menua tu empu.
Program deka dipenyadi Premier Sarawak kena Hari Enam (11 Julai), pukul 10.30 pagi.
Lemai nangkan nya, mensia mayuh mega deka beperindang enggau bala artis ba Konsert Rayat.
Nangkan Sibu, program deka ditandu ba Kompleks Lumba Sarikei (7-9 Ogos), Dataran Pehin Sri Raja di Mukah (28–30 Ogos) sebedau di Kompleks Lumba Betong (4-6 September).-EDISI UKAS
