BINTANGOR: Tiap bengkah pemeri enggau agih belanja ari perintah meseti diatur enggau lurus lalu mai pemaik ngagai sida ke endang patut nerima bantu.

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, penerima bantu mega patut nentu semua program ke diatur sida ulih mai empas positif ngagai mensia mayuh.

"Tentuka bantu ke diberi datai ba sida ke endang patut nerima. Kena pemeri nya enggau manah sereta datai ba tuju," pia ku iya.

Iya bejaku munyi nya maya ngatur penemuai gawa ngagai Bintangor, Stabar enggau Mupong pegai sitak Kunsil Nengeri (DUN) Semop, Hari Satu.

Iya ke mega ADUN Semop maya nya bisi nyauka bantu dikena ngaga projek pemansang enggau nyukung program pelajar.

Sekeda ari bantu ke disua nyengkaum RM60,000 dikena ngaga projek pendai Kampung Abang Amin Zon 2, projek ngaga dek Rumah Lily Awi (RM66,000), Kelab Seni Sekula Primeri (SK) Mupong (RM2,000) enggau Program Ninting Taun Gerempung Apai Indai enggau Pengajar (PIBG) SK Mupong (RM5,000). -EDISI UKAS