Palan Sains Sarawak Disadang Nyadi Hub Kerejasama Saintifik Betikas Global
KUCHING: Palan Sains Sarawak (SSCiEX) disadang nyadi hub kerejasama saintifik betikas global ti ngempuru saintis, raban pemansik enggau institusyen pemansik ari selampur dunya ba pengawa ngiga chara mutar inovatif ke nempa pengelantang dudi hari Sarawak, Malaysia enggau antarabansa.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, SSCiEX ditumbuh ukai semina ngira penguntung Sarawak tauka Malaysia aja tang nyadi pelasar meransang kerejasama kilah entara menua ba bidang sains, teknologi enggau inovasyen.
"Ngagai bala saintis, aram kitai besaup nempa palan tu nyadi makmal dikena nengkebang chara mutar enggau inovasyen ketegal ngira pengelantang Sarawak, Malaysia enggau dunya," pia ku iya maya Pengerami Bejadi Palan Sains Sarawak ditu, Hari Tiga.
Ku iya, Sarawak ke semak garis Khatulistiwa meri pengelebih bekaul rampa menua ti ulih nyukung macham bansa pengawa mansik, inovasyen enggau pemansang saintifik.
Iya madah, pengaya pun penatai asal rampa menua Borneo nyengkaum ai enggau biodiversiti engkeman dikena ngadu pengawa mansik ba macham pekara.
"Aku ngarapka palan tu deka ngemunka singkang ngelawa pengelantang dudi hari," ku iya madah baru.-EDISI UKAS
