KUCHING: Sarawak begunaka mayuh agi saintis menua tu empu dikena ngemujurka ekosistem pemansik enggau inovasyen nengeri ti nguna pengaya pun penatai asal rampa menua bepelasarka sains enggau teknologi lalu mulaika penguntung ngagai nengeri tu.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nengeri tu bisi pengelebih iya empu ke nyadi sebagi ari Pulau Borneo, pulau ketiga pemadu besai di dunya ti kaya enggau asil kampung, sungai enggau ai.

"Kitai ngembuan pengaya ba pun penatai asal rampa menua. Tang bisi pekara ke patut diputar kitai iya nya begunaka mayuh agi saintis.

"Kitai begunaka rebak biak Sarawak ke ngembuan penemu teknologi enggau penemu pemadu baru ngambika sida ulih ngasilka pun penatai asal rampa menua nyadi penguntung ngagai kitai," pia ku iya.

Iya bejaku munyi nya maya Pengerami Bejadi Palan Sains Sarawak (SSCiEX) ditu, Hari Tiga.

Datuk Patinggi Abang Zohari madah, dunya diatu benung betapi enggau ubah klimet ketegal pengangat global ngelui 1.5 darjah Celsius enti dibanding enggau era praindustri ti tau ngeruga pengelantang pengidup mensia.

Nya alai, ku iya, Sarawak meseti landik begunaka asil pun penatai asal rampa menua ti nyadi chara mutar bepelasarka sains, teknologi enggau inovasyen.

Bela datai maya pengerami nya Sapit Premier Sarawak Datuk Amar Awang Tengah Ali Hasan enggau Datuk Amar Prof Dr Sim Kui Hian, Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, Sekretari Pekara Wang Dato Sri Dr Wan Lizozman Wan Omar sereta pemesai ke bukai.-EDISI UKAS