KUCHING: Pengawa ngatur Minggu Sains Menua (MSN) 2026 Zon Sarawak nyadi pelasar beguna dikena ngenegap pengelandik sereta pengerindu ba bidang Sains, Teknologi, Injiniring enggau Matematik (STEM) seriris enggau pengeransing nempa modal mensia bepengelandik di nengeri tu.

Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn madah, penumbuh Palan Sains Sarawak nyadi siti ari pemujur dikena nyungkak pemujur STEM seraya meransang mensia mayuh nambah penemu ba pekara nya.

"Kerejasama rat Perintah Besai enggau Perintah Nengeri deka ngemuntangka pengawa kitai nyendiaka palan belajar ke engkeman ungkup genap iku rayat," pia ku iya.

Iya bejaku munyi nya maya bejadika Minggu Sains Menua ba Palan Sains Sarawak ditu, Hari Empat.

Ku iya, Perintah Sarawak ransing ngemansangka pengelandik STEM nengah pengawa ngatur Program Dwibahasa (DLP) alai nembiak sekula ulih belajar Sains enggau Matematik ngena Jaku Inggeris ke tau bendar nyungkak pengulih besemekih ba renggat global.

Kelimpah ari nya, iya madah, nengah inisiatif Skim Pelajar Tinggi Pechuma (FTES), nembiak Sarawak diberi awak nampung pelajar ba bidang bekaul STEM lalu nadai penanggul belanja agi.

Pengawa nya ku iya, bela disukung macham inisiatif ke bukai baka STEM Trailblazers, STEM Catalysts, nyendia komputer enggau nambah manah tikas internet ba sekula menua pesisir kelimpah peluang pengawa mansik nengah geran BrightSparx.

Dikena nentu Sains ulih mulaika pemaik, program MSN Zon Sarawak 2026 deka ditandu ba pelilih Meradong, Bintulu enggau Belaga ke diatur begulai enggau Opis Pelajar Nengeri Sarawak (JPBNS). -EDISI UKAS