SIBU: Reformasyen pelajar di Sarawak patut disungkak bepelasarka bidang Sains, Teknologi, Injiniring enggau Matematik (STEM) dikena nempa modal mensia betikas global ke ulih ngembing pemansang ekonomi dudi hari sereta tetapika ubah klimet enggau segang teknologi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak ngembuan pengering bekaul pun penatai asal rampa menua tang pengelebih nya semina ulih mulaika pemaik nyema nengeri tu ngembuan orang gawa bepengelandik ba teknologi baru.

Ku iya, ubah landskap ekonomi dunya enggau penanggul klimet begunaka chara mutar bepelasarka sains, teknologi enggau inovasyen alai raban nembiak Sarawak patut disikap enggau penemu sereta pengelandik ti engkeman.

"Kitai meseti nempa anak Sarawak ke nemu teknologi baru dikena kitai nyikap diri mutar penanggul ke deka datai.

"Dikena kitai ngatur ekonomi, kitai begunaka mayuh anak kitai ke ngembuan pengelandik ba STEM," pia ku iya.

Iya bejaku munyi nya maya bejadi Konferens Pengatur Pelajar Prinsipal Sekula Sekondri Sarawak Ke-61 Taun 2026 berambaika jaku Memacu Reformasi Pendidikan: Sinergi Kepimpinan dan Nilai Manusiawi’ ditu, Hari Empat.

Nambahka jaku iya, Datuk Patinggi Abang Zohari madah, dikena nyukung agenda nya, Perintah Sarawak ngatur Program Dwibahasa (DLP) enggau STEM dikena nyaup nembiak sekula landik ba mata pelajar ke diguna ungkup ekonomi dudi hari.

Ku iya, penumbuh Palan Sains Sarawak (SSCiEX) nyadi pelasar ke beguna dikena meri penemu tumu ngagai nembiak bekaul bidang sains enggau teknologi nyengkaum energi hidrogen, teknologi aero singka miga enggau energi ari ai.

Iya madah, palan nya bela disikap enggau buding ngambika nembiak sekula ari menua pesisir bela ulih ngambi bagi ba program pelajar ba endur nya.

"Pengawa kitai meri penemu tumu bekaul teknologi moden deka meri awak ngagai nembiak menua pesisir ngembuan pengelandik ba teknologi.

"Aku enda nyangka anak kitai ari ulu sungai nyengkaum anak Penan nemu ngena dron.

"Reti iya enti kitai ngiri penemu tumu, sida deka landik ba pekara teknologi," ku iya madah baru.

Datuk Patinggi Abang Zohari madah, pemansang teknologi 'artificial intelligence' (AI) bela patut dikena enggau manah dikena nyungkak pemujur pelajar.

"AI tu nyaup kitai. Tang semina orang ke bepenemu aja nemu nama proses 'artificial intelligence'.

"Tu mih gaya dunya maya hari tu. Ke beguna ba AI iya nya kaul iya enggau Large Language Model (LLM) ti nyadi 'jematan' penguna enggau AI," pia ku iya.

Bela datai maya nya Sapit Menteri Pelajar, Inovasyen enggau Pemansang Pengelandik Datuk Dr. Annuar Rapa’ee, Sapit Menteri ba Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) Datuk Abdul Rahman Junaidi, Residen Sitak Sibu Superi Awang Said, Direktor Opis Pelajar Nengeri Sarawak Omar Mahli, Yang Dipertua Gerempung Prinsipal Sekula Sekondri Sarawak ke mega Prinsipal SMK St Augustine, Ujai Sambau sereta Pegawai Opis Pelajar Sibu, Lau Ngie Tung.-EDISI UKAS