KUCHING: KUCHING: Sarawak ngelancharka ‘Sovereign Ai Infrastructure Platform’ dikena ngenegap pengawa ngatur, adminstresyen sereta nyaga data strategik perintah seraya ngerumban pengawa ngenatai servis ngagai rayat.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nengah platform nya, perintah ulih mida data ke ulih dikunsi enggau data strategik ke meseti dijaga.

Ku iya, pengawa nya diatur ketegal perintah bisi data strategik khas bekaul pengelikun enggau hak nengeri ke enda ulih dibantai.

"Kitai benung ngempung data kitai ba siti platform.

"Enti kitai bekunsika semua data tu, tang data ni diguna kitai, data ke patut disimpan tauka dijaga lalu tu guna Sovereign AI ditumbuh," pia ku iya.

Iya nerangka pekara nya maya pengerami ngelachar platform nya ditu, Hari Satu.

Datuk Patinggi Abang Zohari madah, data bekaul servis perintah nyengkaum ari kompeni bekaul perintah (GLC) enggau agensi ke bukai ulih dikunsi ngambika muntang agi meri akses ngagai data nya.

Iya madah, mensia mayuh ambika banding ulih nemu penerang bekaul chara ngepunka dagang, pom ke patut diisi enggau prosedur bekaul ke bukai ngena platform nya.

Kelimpah ari nya iya madah, penemu bekaul operasyen AI, data sereta adminstresyen data beguna dikena nentuka teknologi bekaul ulih pulaika pemaik.

Ku iya, Sarawak Information Systems Sdn Bhd (SAINS) deka ngaga platform ke dikena macham agensi enggau rayat mayuh.

Premier Sarawak madah, sistem nya deka ngemuntangka mensia mayuh bulih penerang tumu agi sebedau ngepunka dagang lalu agensi perintah enggau opis menteri deka nemu pejalai projek.

"Ditu komunikasyen enggau pangan diri deka ditumbuh.

"Ba reti jaku bukai, kitai meseti bisi ekosistem ti tegap bekaul data enggau sistem ke engkeman dikena ngadu projek," ku iya madah baru.

Bela datai maya nya Menteri Industri Pemakai, Komiditi enggau Pemansang Kandang Menua Sarawak Dato Sri Dr Stephen Rundi Utom, Menteri Utiliti enggau Telekomunikasyen Sarawak Dato Sri Julaihi Narawi, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri ba Opis Premier Sarawak Dato Sri John Sikie Tayai, Menteri Pengangkut Sarawak Dato Sri Lee Kim Shin, Sekrtetari Perintah Sarawak Datuk Amar Mohamad Abu Bakar Marzuki, bala Sapit Menteri Sarawak, Chairman SAINS Datuk Patinggi Tan Sri Dr George Chan Hong Nam, Tuai Pegawai Eksekutif SAINS Busiai Seman, Tuai Opis Perintah sereta pemesai ke bukai.-EDISI UKAS

Pemberita: Ahmad Daniel Faiz
Gambar: Ameerul Shafiq Khir