Lebih 17,000 Peminta ALAF Diterima, 5,000 Pintu Bilik Menua Pesisir Deka Bisi Karan
KUCHING: Lebih 17,000 peminta Program Alternatif Menua Pesisir (ALAF) di Sarawak udah diterima alai Renggat 5 program nya disadang deka mai pemaik ngagai 5,000 pintu bilik.
Menteri Utiliti enggau Telekomunikasyen Sarawak Dato Sri Julaihi Narawi madah, program nya deka diteruska ngagai renggat nangkan nya dikena ngamatka juluk ati perintah nengeri deka meda mayuh agi ruang bilik di menua pesisir bisi karan.
"Ba Renggat 5, kitai melabaka 5,000 pintu bilik deka bisi karan lalu peminta ke diterima lebih 17,000 iti. Nya alai, ALAF deka dipajakka ungkup renggat nangkan tu," pia ku iya.
Iya madah munyi nya maya meri simpul jaku ari opis menteri iya ba Aum Kunsil Nengeri (DUN) Sarawak Ke-19, Hari Satu.
Iya madah, penyampau peminta ke diterima ngelui ari penyampau penerima ungkup Renggat 5 alai program nangkan nya deka dipajakka.
Kelimpah ari nya, ku iya, Perintah Sarawak mega udah ngungkupka RM150 juta ungkup projek infrastruktur karan di Samarahan enggau RM198 juta di Sitak Betong.
Maya nya iya mega madah, perintah bela ngenegapka agi infrastruktur utiliti nengah Pelin Besai Bekal Ai Sarawak enggau Sistem Grid Ai Sarawak ke mungkur pengawa nganti paip lama, ngadu palan mantis, nyambung sereta nyadung ai.
Ba sektor telekomunikasyen ku iya, bisi 350 taba baru diungkupka ngagai insiatif JENDELA 2.
Iya madah, projek nya sebagi ari pengeransing perintah nentuka penegap infrastruktur bekal karan lebih agi ungkup rayat di menua pesisir. -EDISI UKAS
