RM671,000 Dikena Nagang Pengelekai Rabies Di Entara Menua Indonesia
KUCHING: Perintah Sarawak ngungkupka belanja RM671,000 ba taun 2027 dikena nagang pengelekai rabies di entara menua Sarawak-Indonesia.
Menteri ba Opis Premier Sarawak Dato Sri John Sikie Tayai madah, agih nya deka dikena meli vaksin antirabies ungkup uduk, belanja operasyen enggau kereban operasyen bekaul.
"Agih belanja tu beguna amat dikena nyukung pengering operasyen Immune Belt Enforcement Team (IBET), ngatur pengawa nyeliah sereta sukung ngagai pengeransing Perintah Sarawak mutar pengelekai rabies di Sarawak," pia ku iya.
Iya madah munyi nya maya meri simpul jaku ari opis menteri iya ba Aum Kunsil Nengeri (DUN) Sarawak Ke-19, Hari Satu.
Dato Sri John madah, naka Oktober 2026, IBET mujur meri vaksyen ngagai 13,616 iku ukui ba sepemanjai entara menua Sarawak-Indonesia lalu datai ba tikas imuniti beraban 94.33 peratus.-EDISI UKAS
