Pemujur FEIAP Matak Pengerindu Delegit Antarabansa Pulai Baru Ke Sarawak
KUCHING: Pemujur Sarawak nyadi tuai rumah alai ngatur Gempuru Besai enggau Konvensyen Serakup Institusyen Injiniring Asia enggau Pasifik (FEIAP) bulan siti tadi ukai semina ngenegapka kaul injiniring antarabansa tang mega matak pengerindu delegit menua bukai datai baru ngagai nengeri tu.
Chairperson Institusyen Injiniring Malaysia (IEM) Pampang Sarawak, Datu Ir. Dr. Angelia Liew San Chuin madah, gempuru nya mujur matak lebih 2,000 iku nyengkaum urung 800 delegit enggau raban ari 25 buah menua.
"Ba penemu aku, program tu mujur amat laban kami nerima timbal ari raban ekonomi ti madahka diri deka nemuai ke Sarawak sekali agi lalu meda chara baka ni kitai ngatur asil penatai," pia ku iya.
Iya bejaku munyi nya maya dirandau media sepengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kunsil Nengeri (DUN) Sarawak ditu, Hari Satu.
Iya mega madah, tuju penemuai basa nya dikena ngenataika terima kasih ngagai Premier Sarawak ke mujur ngatur FEIAP, kelimpah ngelaluka penatai ngulu Pengerami Makai Lemai Ninting Taun IEM Sarawak, ujung September tu.
Pengerami nya diatur ba Palan Konvensyen Borneo Kuching (BCCK) sereta disadang digulu urung 1,300 temuai nyengkaum pengari industri enggau komuniti injiniring.-EDISI UKAS
