KUCHING: ‘Sovereign AI Infrastructure Platform’ ti ngempung data enggau penerang perintah ba siti platform ulih nyaup ngerumban langgur sereta pemansang mengeri pintar di nengeri tu.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, data ke disimpan ba siti platform ulih dikena ngelanggur pemansang nyengkaum endur rumah, pelilih menua, palan dagang enggau pejalai perengka pengangkut mensia mayuh.

Ku iya, tu deka ngemuntangka perintah ngaga projek enggau lengkas agi.

"Ari nya kitai ulih ngaga projek enggau jampat agi. Reti iya kitai deka ngena data nengah siti platform aja," pia ku iya.

Iya nerangka pekara nya ngagai media sepengudah pengerami ngelachar ‘Sovereign AI Infrastructure Platform’ ditu, Hari Satu.

Nambahka jaku iya, Datuk Patinggi Abang Zohari madah, nengah platform nya, penguna semina ngiga penerang bekaul baka endur, pemesai kandang endur sereta data bekaul sebedau ngenataika peminta ngagai perintah ngaduka pemansang ba palan dikedeka.

"Tama aja ngagai platform kitai, kitai ulih madah dini endur, berapa pemesai, nama ke dikena ba data tu. Nadai beranti agi.

"Nangkan nya, peminta ulih dikenatai terus ngagai perintah. Tu jampat agi," ku iya madah baru. -EDISI UKAS

Pemberita: Ahmad Daniel Faiz
Gambar: Ameerul Shafiq Khir