Korea Selatan Ba Rintai AirBorneo Digagaka Penerebai Bilun Kuching-Pulau Jeju
KUCHING: Korea Selatan ba rintai menua nyadi menua baru ke tau digagaka penerebai bilun terus AirBorneo ari Kuching, lebih agi ke Pulau Jeju.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, pekara nya deka ngerandang mayuh agi peluang dagang temuai lebih agi dua buah menua tu nyadi Geopark Dunia UNESCO (UGGp).
Ku iya, Pulau Jeju udah nerima basa nya lalu Kuching disadang taun siti agi.
"Korea endang ba rintai kitai, lalu ngarapka AirBorneo ulih ngatur penerebai bilun tu enda lama agi," pia ku iya.
Iya nerangka pekara nya ba aum media sepengudah ngulu Pacific Asia Travel Association (PATA) Travel Mart (PTM) 2026 Knowledge Forum ditu, Hari Dua.
Ku iya, Korea Selatan ngembuan mayuh pengelebih nyengkaum muzik, teknologi, automotif enggau lumba.
Kelimpah ari nya iya madah, Bangkok mega nyadi menua ke diperunding digagaka penerebai bilun AirBorneo nangkan Jakarta ke deka berengkah bulan siti agi.
"Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg deka bisi penerebai bilun terus ke Pulau Jeju, nyangka nangkan Jakarta.
"Jakarta berengkah bulan siti agi lalu udah nya nyangka Bangkok tauka Pulau Jeju," ku iya madah baru.
Bela datai ba pengawa nya, Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak Morshidi Fredrick, Tuai Pegawai Eksekutif Sarawak Tourism Board Dr Sharzede Salleh Datu Salleh Askor, Chairman PATA Henry Oh enggau Tuai Pegawai Eksekutif PATA Noor Ahmad Hamid. -EDISI UKAS
