KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi nerima penemuai basa Jawatankuasa Pilihan Khas Tatakelola, Integriti dan Antirasuah (JKPK) di Astana Negeri Sarawak, Hari Tiga.
Penemuai basa nya diuluka Chairman JKPK, Senator Dato’ Setia Salehuddin Saidin serimbai penemuai basa ngagai Sarawak empat hari dikena berati sereta mansik chara ngatur, integriti enggau prosedur gawa beberapa bengkah agensi perintah.
Dato’ Setia Salehuddin madah, sekeda endur ke ditapat iya nya Padang Bilun Antarabansa Kuching (LTAK), beratika proses tama pansut mensia mayuh enggau prosedur digaga dikena nyeliah chara tama enda dikemendar.
"Kelimpah ari nya kami mega deka nemuai ngagai Ombudsman Sarawak ti bela beratika pengulih institusyen tu ngenegapka pemanah gawa enggau integriti," pia ku iya maya dirandau.
Iya mega madah, penumbuh Ombudsman di Malaysia kala dipansik komiti sida nengah pengawa nemuai ngagai beberapa buah menua nyengkaum Hong Kong.
"Ba kami Ombudsman endang patut ditumbuh di Malaysia ke nyadi siti komiti berati integriti opis perintah.
"Penemu tu udah dibai ngagai Menteri Besai, Dato' Seri Anwar Ibrahim lalu aku dipadahka pekara tu nyangka deka dibantai di Parlimen," ku iya madah baru.
Penemuai basa ngagai Tun Pehin Sri Dr Wan Junaidi ti kala nyadi Yang Dipertua Dewan Negara bela bisi berandauka pekara bekaul undang-undang lebih agi bekaul penumbuh Komiti Pilih Khas Opis.-EDISI UKAS
Pemberita: Ahmad Daniel Faiz
Gambar: Shahril Haqim
