UUM, UKAS Negap Kerejasama Strategik Ngatur i-COME’26
KUCHING: Universiti Utara Malaysia (UUM) enggau Unit Komunikasi Awam Sarawak (UKAS) negap kerejasama strategik besaup ngatur Konferens Antarabangsa Komunikasyen enggau Media ke-10 (i-COME’26) ke deka diatur di Muzium Budaya Borneo, kena 11 ngagai 13 September 2026.
Pekara nya dirandau maya penemuai basa delegit UUM ti betuaika Pengelicha Kanan Palan Pemansik Teknologi Multimedia enggau Komunikasyen (SMMTC) UUM ke mega Direktor i-COME, Dr Jamilah Jamal ngagai Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol ba indu Opis UKAS ditu, Hari Dua.
Bela datai maya nya Sapit Direktor 1 UKAS Mohamed Faizal Shah Ali, Sapit Direktor 2 UKAS Joachim Paggang Jabong sereta Pegawai Kanan UKAS ke bukai.
i-COME’26 siti konferens antarabansa ti ngempuru raban akademik, Pemansik, pemain industri, penengkebang polisi enggau raban nembiak ari Malaysia enggau mayuh menua antarabangsa ke bukai.
Sekeda ari tusun program maya i-COME’26 iya nya woksyop “Social Media Data Analytics for Beginners” begulai enggau Dekan SMMTC UUM, Profesor Madya Dr Mohd Khairie Ahmad ti deka nerang chara berati, ngumpul, ngambi sereta nyerenih data media rama lalu ngasilka analisis sentimen ti besai reti.
Berindik ari nya UUM minta saup UKAS ngangauka penatai raban media Sarawak bela ngambi bagi ba woksyop nya kelimpah minta sukung ba pengawa nabur terus.
Awak nya bela dikena UUM nengah SMMTC berandauka langgur minta UKAS nyadi bakih institusyen strategik ba bidang komunikasyen digital.
Kerejasama UUM enggau UKAS bela bisi pengulih ngenegapka kaul institusyen akademik, sektor perintah sereta raban media kelimpah meri awak bekunsika pengelandik, pemansang pengelandik sereta ngasil inovasyen digital dikena ngenegap ka agi komunikasisyen rama. -EDISI UKAS
