KUCHING: Operasyen Menih Remang (OPA) di Sarawak dilanjar nyentuk 7 September tu enggau meri perati ngagai palan ngandang ai Tekat Ai Batang Ai, Bakun enggau Murum berindik ari tikas ai ti agi baruh ba tekat ai nya.

Direktor Opis Meteorologi Malaysia (METMalaysia) Sarawak, Khairul Najib Ibrahim madah, Agensi Penyangga Penusah Menua (NADMA) udah ngemendar pengawa ngelanjar operasyen pengelama dua hari pengudah OPA ti keterubah ditaga diatur ari 3 nyentuk 5 September.

Ku iya, operasyen sebedau tu mujur ngasilka ujan ba sekeda endur nyengkaum Murum, Bakun, Serian enggau Batang Ai, tang penyampau ujan ti diterima apin ulih nyapai tikas ti dikedeka.

“Endang bisi ujan, tang nadai mayuh laban tebal agi remang beginsit ke sepiak, ke menua sepiak ketegal angin bepuput kelalu deras lebuh nya.

“Tebal agi remang endur kitai ngadu menih beginsit ngelui adan menua ke menua sepiak, nya kebuah semina mimit aja ti nyadi di Batang Ai,” ku iya.

Iya madah munyi nya lebuh dirandau pemberita lebuh OPA di Pengkalan Langit Kuching, ditu kena Hari Minggu.

Khairul nerang, gaya remang enggau gaya hari mega ngeruga penemban operasyen nyentuk ujan enda ulih diasilka ba sekeda endur ti diselinting.

Berebak enggau nya, iya ngarap gaya atmosfera sepanjai timpuh ngelanjar operasyen engkeman agi nentuka pengawa menih remang meri asil ti manah agi kelebih agi ba tekat ai.

“Kitai ngarap ba kandang dua hari tu, operasyen mujur lalu meri perati ngagai endur ngelingi Batang Ai enggau tekat ai di Sarawak dikena nyukung industri menua kitai enggau guna domestik sereta industri di Sarawak,” terang iya.

Bela ngulu operasyen iya nya Sapit Sekretari Perintah Sarawak (Administrasyen), Datu Felicia Tan Ya Hua ti ngabas pejalai OPA sereta pekara ti nyadi ba tekat ai bekaul.

Nangkan nya, Mandal Presiden Hidro Sarawak Energy, Jonny Wong Kwei Ji madah, tikas ai Tekat Ai Murum agi nurun seraya begunaka OPA ditampung.

Iya mega madah, Tekat Ai Murum enggau Bakun diatu manggai tikas‘Emergency Level 1’, seraya Tekat Ai Batang Ai udah nyapai ‘Emergency Level 3’.

Terang iya, Tekat Ai Batang Ai nyadi perati operasyen sekali tu berindik ari tikas ai ti kritikal enggau bacha 98.19 meter ari dalam tasik (mASL) dirikod. - EDISI UKAS

Pemberita : Ahmad Daniel Faiz
Gambar: Ibanez Jeffery