KUCHING: Librari perubat diatu ngerembai nyadi komponen strategik ba ekosistem pengerai ti nyukung pengawa berubat bepelasarka pengamat, analisis data sereta polisi pengerai.

Sapit Premier Sarawak Datuk Amar Professor Dr. Sim Kui Hian madah, tanggungpengawa librari perubat ukai semina ditatak nyadi palan nyimpan penerang aja tang bela nyaup pemansang sistem pengerai bepelasarka teknologi.

"Lirari ukai agi endur mensia mayuh ngiga penerang aja tang bela megai tanggungpengawa ke chukup besai nempa pengawa perubat bepelasarka bukti sereta ubah polisi pengerai kitai," pia ku iya.

Iya nerangka pekara nya ngagai media sepengudah Pengerami Bejadika Seminar Librari Perubat Asia 2026 (AMLIS 2026) di Muzium Budaya Borneo ditu, Hari Dua.

Iya ke mega Menteri Pengerai Mensia Mayuh, Pengawa Berumah enggau Perintah Lokal madah, data besai ke dikembuan librari perubat ulih pulaika pemaik nengah analisis data dikena ngemujurka agi pengawa mansik sereta langgur polisi pengerai.

Ku iya, transformasyen digital bela meri peluang ngagai Sarawak nyungkakka agi teknologi dikena ngenegap ekosistem pengerai nengeri.

Iya madah, ekosistem pengerai nya bela mungkur macham sektor nyengkaum dagang temuai perubat, pemujur tetemuka ubat baru, pengawa mansik sereta integrasyen 'artificial intelligence' (AI) dikena nyaup napi penanggul suntuk lutur.

AMLIS 2026 diatur berengkah 8 ngagai 9 September 2026 berambaika jaku “Empowering Health Knowledge: The Future Role of Medical Libraries in Asia” digulu penyereta bekaul pengawa berubat nyengkaum nembiak ari Malaysia enggau rantau Asia.

Program nya bela dikemujurka pengelicha ari Thailand, Republik Korea, India, Hong Kong, Australia, Taiwan, Indonesia enggau Singapura.-EDISI UKAS